Namzgva hamz miz danbwzciz、huzlauxbaeg doxgaiq、veizswnghsu、anhgihsonh、gai、sinh、dez、linz daengj gij cwngzfwn ndang vunz aeu miz 8 cungj doxgaiq haenx, gij huq neix couh dwg gij yenzliuh bouj lwed.

Makcauj nding hix hamz miz veizswnghsu、gojdangz caeuq gak cungj anhgihsonh. Ywleix yenzgiu cwngmingz: Mbangj cwngzfwn ndaw makcauj ndaej diuzcez ndang vunz sup haeuj baiz ok, coi sibauh moq vaiq di seng baenz, caemh ndaej demgiengz goeng- naengz caux lwed ndaw ndokngviz, demgya hungzsibauh ndaw lwed hamzliengh, yienghneix couh ndaej hawj naengnoh ngaeuzwenj miz danzsingq.

Oij vunzvunz cungj maij gwn, ndaw oij hamz miz daihliengh diet、gai、sinh daengj gij yenzsu ndaw ndang vunz aeu miz haenx, ndawde hamz diet daegbied lai, moix goenggaen oij couh miz baenz 9 hauzgwz, hamzliengh lai gvaq sojmiz lwgmak wnq.

Makit singq bingz feih vansoemj, ndaej bouj heiqlwed、giengz nyinz ndok. Ndawde hamz miz daihliengh buzdauzdangz, doiq bouxlaux、mehmbwk ndang nyieg lwedhaw miz bouj ndang cozyung, doiq boux aenvih lwedhaw caeuq boux naetnaiq gvaqbouh bouj ndang haemq ndei.