Dahcej gou bineix cib bi, de byoemgyaeuj raezrang, doiqda ronghrikrik, baez riu gij heuj hausagsag de couh loh okdaeuj. Youq ndaw yaenqsiengq gou, dahcej dwg boux sawmaez he.

Dahcej baez ndaejhoengq couh yawj saw, baez yawj saw couh haeujmaez. Youq ndaw hagdangz, mwh roengzdangz, dahcej ciengz- ciengz cungj dwg naengh youq diegnaengh yawj saw, ciengzseiz yawj daengz lauxsae daeuj hwnjdangz lo lij mbouj rox. Boux doengzhag doengzdaiz ciengzseiz ndaej daezsingj de, daengz doengz- hag daezsingj de le cij roxsingj gvaqdaeuj.

Dahcej yienghyiengh saw cungj gyaez yawj, ndawde ceiq gyaez yawj haenx dwg saw gojgaeq. Geiq ndaej miz baez ndeu, de daj ndaw hagdangz ciq ndaej song bonj saw gojgaeq, bonj ndeu dwg 《Gojlwgnyez Gwzlinz》, bonj ndeu dwg《Gojlwgnyez》. Youq ndaw hagdangz, baez roengzdangz dahcej couh dawz gij saw gojlwgnyez neix daeuj yawj. Cuengqhag ma daengz ranz, dahcej couh sikhaek sij cozyez, cozyez sij sat le, de youh sikhaek dawz saw gojlwgnyez daeuj yawj. Daengz gwn caeuz le, daxmeh heuh sam heuh seiq, dahceh cij sij mbouj ndaej cuengq saw daeuj gwn caeuz.

Daengz gyanghaemh, dahcej youh laebdaeb yawj saw, yawj daengz haemq gvaiz lo lij mbouj siengj ninz, hix dwg daxmeh coi bae coi dauq de cij ninz.

Dahcej gou dwg boux sawmaez, gou hix aeu lumj dahcej nei guh boux vunz gyaez doegsaw ndeu.（指导教师：李雪海）