Raet danbwz sang、youzlauz noix、noix ndat, hamz miz veiz- swnghsu caeuq lai cungj gvang- vuzciz, deng gyoengq yingzyangjswh haenh ndei. Raet miz lai cungj lai yiengh, yingzyangj hix miz bien naek, lwgnyez ndaej bi buenq doxhwnj gwn raetgimcim、raetrang、raetmoegngaex ceiq ndei.

Raetgimcim: Hamz miz ndang lwgnyez sengmaj fazyuz aeu miz gij laianhsonh、cingh’anhsonh, doiq coicaenh lwgnyez geiqsingq、haifat lwgnyez ciliz miz daegbied cozyung, gij veizswnghsu D ndaw raet, ndaej coicaenh gai、linz siuvaq supsou, caemhcaiq hawj de yaemz youq ndaw ndok caeuq diuzheuj, doiq coicaenh goetndok caeuq diuzheuj lwgnyez sengmaj fazyuz, yawhfuengz binghndokunq miz cizgiz cozyung, danhseih lwgnyez baenz dungx hawcaep mbouj hab gwn.

Raetmoegngaex: Ndaw raet- moegngaex hamz diet、gai gig lai, ciengz gwn ndaej yawhfuengz lwgnyez baenz noix diet lwedhaw. Vih hawj lwgnyez siuvaq ndei, cawjranz wng cimq raet gawh swiq seuq raed soiq boiq gijgwn wnq cawj hawj lwgnyez gwn.

Raetrang: Raetrang hamz ndat noix, hamz danbwzciz caeuq veizswnghsu lai, ndaej daezgung hawj aenndang lwgnyez aeu miz lai cungj veizswnghsu, doiq lwgnyez sengmaj fazyuz gig miz ndeicawq. Ndaw raetrang hamz miz mwznauj- cunz, cungj doxgaiq neix ndaej cienjbienq baenz veizswnghsu D, ndaej coi ndang lwgnyez supsou gai. Ciengz gwn de ndaej demgiengz lwgnyez menjyizliz, caemh ndaej yawhfuengz binghdoeg dwgliengz. Lwgnyez siuvaq hidungj lij unqnyieg, raetrang itdingh aeu swiq seuq、naengj cug naengj naemz. Siengj cungfaen supsou yingzyangj raetrang, ceiq ndei dwg senj cawx raet sauj.

Raet yienznaeuz yingzyangj lai, danhseih lwgnyez mbouj hab baez dog gwn daiq lai, caemhcaiq aeu dapboiq gijgwn wnq dem cij ndaej fazveih gij gyaciz ceiq ndei de.