Gyaeujsuenq ndaej gaj nengz siu humz, ndaej gaj dai haujlai cungj nengzbingh caeuq binghdoeg. Ciengz gwn gyaeujsuenq ndaej yawhfuengz baenz dwgliengz、beghouz caeuq dungxsiq, lij ndaej fuengz aiz caeuq hanhhaed sibauh aiz sengmaj. Ndaw gyaeujsuenq hamz sih gig lai, ndaej gyavaiq goyangjva doxgaiq ndaw ndang faengaij, hanhhaed sibauh aiz. Gyaeujsuenq lij ndaej gyangq hezcij, moix ngoenz gwn aen daengz song aen gyaeujsuenq, gvaq sam ndwen hezcij gag doek roengz daengz cingqciengz. Baenzneix, de ndaej yawhfuengz bouxvunz baenz gvanhsinhbing caeuq dangzniubing, hix ndaej dingj nyieglaux.

Yw haexgaz: Aeu gyaeuj- suenq dip dog saz cug, bok gvamq yungh faiq suek ndei, swnh ndat cuengq duenh aek baihlaj, couh ok ndaej haex lo.

Yw dungxsiq dungx in: Gyaeujsuenq dip dog saz cug, daem yungz caeuq daengjliengh mba vangzlenz nyaenj baenz naed. Raemxreiz soengq gwn, baez 10 gwz, ngoenz 3 baez, miz daegbied yaugoj.

Yw funghanz dwgliengz: Gyaeujsuenq 400 gwz, hingndip 150 gwz, makcengz 3 aen, dangzrwi 70 hauzswngh, laeujhau 1000 hauzswngh, sien naengj roxnaeuz cawj gyaeujsuenq yaep ndeu, caiq ronq baenz gep, hingndip caeuq makcengz caez ronq baenz gep itheij cimq laeuj 3 ndwen le gwn. Ndaej giep fung sanq caep gaij biuj, cawj ceih funghanzsingq dwgliengz, doiq yw yiengzhaw yinxhwnj baenz din fwngz lau nit、ciengz lae mugheu、nyouh deih miz itdingh yaugoj.