Ranzmbanj gou gig gyaeundei!

Gyanghaet mbwn ngamq rongh- momj, ndaw mbanj ranzranz congh- heuq hoenzfeiz couh hwnjfodfod lo. Yawj giz gyae, dinbya goengqbya vanzlij dwg saekndaem, hoeng dingjbya sangvid haenx gaenq deng daengngoenz ciuq dwk henjrwgrwg. Gaeqboux haen’oo, daxau bohlungz gwed cae gwed rauq yaek bae gengnaz lo, mehsimj mehbaj daek haeuxcuk roengz ndaw doengz bae, caiq yungh mbawceij duk geng gyu ndeu, daiq bae naz, neix couhdwg gij haeuxngaiz gyoengqde lo. Seizneix daengngoenz gaenq hwnj sang, duzmou ndaw riengh daeuhnye’nye, daxbuz daxgoeng ganjvaiq dawz mok bae gueng mou; lwgnyez cuengq duzgaeq duzbit okdaeuj, vanq haeux youq gwnz dieg hawj gyoengqde gwn, duzgaeq duzbit angq ndaej swenjgogo hemqab’ab. Gwn imq le, duzgaeq ndonj haeuj ndaw ndoeng bae angq, duzbit buet roengz ndaw daemz bae youzraemx, yaepyet ndaw mbanj caemdingh roengzdaeuj lo. Ndaw naz ndaw reih cix nauhnauh yiedyied. Bouxsai dawz cae dawz rauq, mehmbwk bau gyaj ndaemnaz, sing hat vaiz、sing gangjvah……Dauqcawq yienh ndaej nyaengq- foedfoed.

Banngaiz, gou byaij gvaq benq ndoengfaex ranzmbanj, raqraq rumz liengzsisi ci haeuj naj daeuj, byoem- gyaeuj mbinyagyag, ndaw rumz cab miz heiq homfwd youh singjsien. Loeklak miz song sam sing duzroeg daj ndaw ndoengfaex cienz daeuj, daekgaeuj henz roen hemqgitgit. Va ndoi hoengzhoengz henjhenj vava loegloeg, lumj ndaundeiq vanq youq gwnz dieg nei. Gou dingz din roengzdaeuj, yiengjsouh cungj gingj gyaeu heiq hom neix, cungj mbouj siengj byaij bae.

Daengngoenz miz di naetnaiq lo, siengj laepda ninz lo. Gyoengq- vunz guhhong boux gaen boux dauqma, gij hoenzfeiz youh dauq swng hwnjfodfod lo. Gwn caeuz gvaq le, mbangj boux bae cunzranz, doxyaeng gij hongsaeh ngoenzcog, miz mbangj youq ranz gangjgoj yawj densi. Gij rongh ronghndwen saj youq benq dieg ranzmbanj, henz naz go’nywj gaenq haeujninz, gwnz ndang venj miz naed raemxraiz. Hoeng henz roen vanzlij nauhyied raixcaix, daekgaeuj ciengqgo duzgoep daeuj buenx, couh lumj diuzgo rwenzrwd ndeidingq ndeu.

Ranzmbanj gou yienznaeuz mbouj dwg lajbiengz ceiq gyaeu, hix mbouj dwg gig fouqmiz, hoeng youq ndawsim gou, ranzmbanj gou ceiq gyaeundei, ciengxlwenx ndaej hawj gou gamjdaengz raeujrubrub.

（指导老师： 林锦凤 陆全耀）