Youq henz mbanj ranz daxbuz gou miz aen daemz ndeu, ndaw daemz miz haujlai byanouq. Moix bi seizcou ndaw daemz raemx mboek le, dou couh bae ndaw daemz vat bya- nouq.

Bi’gvaq seizcou, miz ngoenz singhgiz roek ndeu, gou caeuq biujgo bae ndaw daemz vat byanouq. Youq ndaw daemz, gou yawjraen ndaw boengz miz haujlai congh iq, biujgo swnh congh iq vat roengzbae, gou cam biujgo: “Vihmaz swnh aencongh vat roengzbae ne?” Biujgo gangj: “Aenvih miz congh, hojnaengz couh miz byanouq youq laj ndoj.”

Gou ciuq gij yiengh biujgo bae guh, raen miz congh iq gou couh vat roengzbae, gou song fwngz vat roengz boengz bae, haidaeuz cij vat ndaej boengz mbouj vat ndaej byanouq, hoeng gou mbouj doeknaiq, gou youh laebdaeb ra congh vat, caen vat ndaej byanouq dahraix lo. Duz byanouq raeuzrwdrwd, baez gaem dawz couh rod deuz, doeklaeng gou aeu fwngz menhmenh gop dawz de, baezneix de deuz mbouj ndaej lo, gou couh menhmenh cuengq roengz doengj iq bae. Gou caeuq biujgo vat daengz banhaemh, dou vat ndaej haujlai byanouq, gou caeuq biujgo angqhoho dawz bya ma ranz lo.

Ngoenzneix gou caen sim’angq ha! （指导老师:韦春柳）