Daxau gou miz sam dah lwg, dahlwg daxau hix dwg dahnuengx gou. Dahnuengx gou yienznaeuz mbouj caeuq gou caez youq, hoeng moix ngoenz gyoengqde cungj gaen daxgoeng gou daeuj ranz gou guhcaemz. Gangj daengz gyoengqde caen dwg hawj vunz youh caengz youh gyaez ha. Daegbied dwg song dah daihngeih songseng haenx engq dwg hawj gou mbouj miz banhfap.

Song dah songseng neix bineix ndaej seiq bi lo, song de maj ndaej gig doxlumj, danghnaeuz mwngz mbouj sijsaeq yawj aen geiqhauh gwnz naj haenx, mwngz gaenbonj faen mbouj ok bouxlawz dwg ceh bouxlawz dwg nuengx bw? Hoeng, doenggvaq singyaem gyoengqde gou couh faen ndaej ok, dahcej singyaem lai gok di, dahnuengx singyaem lai laux di.

Geiq ndaej miz baez ndeu, sam dah nuengx neix youq ranz gou guhcaemz. Gou cingqngamj daj gwnz haw cawx ndaej bonj saw lienzvanzva he ma, byawz rox gou ngamq cienq ndang hwnj laeuz aeu di doxgaiq, bonjsaw moq gou gaenq deng song dahnuengx songseng sik vaih lo. Dangseiz gou huj raixcaix, lienz- muengz sing hung ndaq naeuz:“Sou song dah manz neix, siengj ra moeb ha? Vih maz dawz bonjsaw moq gou sik vaih bae ha? Baezlaeng gaej daeuj ranz gou guhcaemz lo, vaiqdi okbae!” Song dah neix raen gou sing hung ndaq song de, caengz caj gou moeb, song de cix vunzyak sien gauqciengq lwnh daxgoeng lo:“Daeggo mbouj hawj saw dou yawj, dawz saw moq yo hwnjdaeuj, dou siengj dawz daeuj yawj, hoeng saw cix deng daeggo sik vaih bae mbouj hawj dou yawj lo.” Dingq daengz song de yienghneix gangj, gou caen dwg huj dahraix lo. Daxgoeng doeklaeng lij gangj gawq vah hawj gou engq huj ndeu: “Mwngz dwg daeggo, mwngz hung lo, hix roxsaeh lo, mbouj ndaej haep dahnuengx bw.” Gou ndawsim gig mbouj vuen, baezlaeng song dah neix mbouj rox bienqbaenz baenzlawz ne!

Gyoengqde miz seiz hix dwggyaez raixcaix. Miz baez he, mehsimj gou daj Gvangjdungh dauqma, cawx ndaej haujlai gijgwn ma, mehsimj mbouj heuh gyoengqde dawz gijgwn okdaeuj baen gou. Gvaqlaeng song de cix moix vunz ndaw daeh cang rim gijgwn haenx, soengq daeuj hawj gou, ndaw bak lij gangj: “Daeggo, ngoenzcog gou daiq lai di daeuj hawj mwngz, hoeng mwngz gaej gangj hawj daxmeh gou nyi bw. Daxmeh naeuz mbouj ndaej dawz okbae, vunz lai mbouj gaeuq gwn.”

Mwngz yawj, neix couhdwg dahnuengx gou, dwgcaengz youh dwggyaez. (指导老师：陆冬群)