Gou cuengqhag ma daengz ranz, haeuj ranz yawjraen gwnz daiz miz mbaw ceij ndeu, gwnz ceij sij：“Siuj- hungz, daxmeh bae guh hong lo, mwngz swhgeij gag cawj byaek ba.” Gou ndawsim gag naemj：Dwg ha, daxmeh ciengzseiz youq rog guh hong, ma ranz lij cawj ngaiz cawj byaek hawj gou gwn, geijlai sinhoj ha. Gou gaenq sam nienzgaep lo, swhgeij wnggai rox cawj byaek lo. Naemj daengz gijneix, gou gietdingh gag cawj byaek.

Gou aeu byaek daeuj swiq. Gou sien dawz mbawbyaek henjgeq mbaet bae, caiq aeu raemx daeuj swiq, gou swiq byaek ndaej seuqswtswt, yienzhaeuh aeu cax daeuj cab, gij byaek deng gou cab ndaej miz hung miz iq, miz dinj miz raez. Gou diemj feiz caj rek hoengz ndat le, cuengq di youz roengz rek bae, gaen dwk dawz byaek cuengq roengz rek bae, cij dingqnyi ndaw rek yiengj “bibi baba”, gou yungh gucanj aeu byaek fan bae canj dauq, youh gya di raemx roengz rek bae, daihgaiq seiq haj faen cung, byaek couh cawj cug lo. Gou dawz byaek daek haeuj ndaw buenz le, aeu dawh daeuj cimz, o, gou lumz cuengq gyu lo. Gou ganj- gip cuengq di gyu roengz ndaw byaek bae gyaux.

Daxmeh guh hong dauqma, cam gou naeuz：“Lwg ha, ngoenzneix byaek cawj ndaej baenzlawz yiengh ha？” Gou mbouj ndei eiqseiq dap naeuz：“Gou dawz byaek cawj cug lo, hoeng gou lumz cuengq gyu lo, doeklaeng cij gya roengzbae, mbouj ndei gwn geijlai.” Daxmeh naeuz mbouj youqgaenj, lai cawj geij baez couh ndaej lo. Daxmeh lij haenh gou naeuz gou majhung lo, rox guh saeh lo. Gou ndaej bang daxmeh guh di saeh, ndawsim gou diemzsisi.

（指导老师：杨金梅）