Guengjsae gak dieg、gak danvih hingzbaenz le song daih baij cujciz vunzlai, gyoengqde miz mwngz mbouj miz gou dwk doxdingj, gak baij cungj laihnaeuz swhgeij dwg “hengzguh lohsienq gwzming Mauz Cujsiz”, doiqfueng dwg “mbouj souj lohsienq gwzming Mauz Cujsiz”, gyoengqde doxceng doxvet, daj doxdub doxdik、ndek rin doxhoenx、doxsaj fagcagang, bienqbaenz nyingz cungq、hai bauq, hoenxdaeuq ngoenz haenq gvaq ngoenz. Mbangj goengdaeuz gip sip haeujbae.

Vihliux gaijgez ndei gij saeh Guengjsae, Couh Wnhlaiz cungjlij daj bi 1967 ndwen 6 daengz ndwen 11, gonqlaeng 8 baez ciepraen gvaq gij duenzdaibyauj song baij Guengjsae daengz Baekging haenx caeuq gij daibyauj goengdaeuz dingjrengz cojgingh bingdoih haenx. Veiz Gozcingh caeuq Gyauz Yaujgvangh、Vuj Cinnanz、Ho Hihmingz、Anh Bingzswngh、Ho Fan daengj geij boux suhgi youq Baekging neix cungj bae camgya gvaq, cijmiz Cinz Yinggih baenzbingh mbouj bae Baekging.

Mwh ciepraen, cungjlij yienz- naeuz nyaengqnyatnyat, hoeng cungj naihsim dingq song baij gangj yigen, sim’unq simndei dwk heuh daihgya youq Swhsiengj Mauz Cwzdungh aen goekdaej neix gwnzde doxgap hwnj- daeuj.

Mwh Veiz Gozcingh youq Baek- ging, de dingq cungjlij gangj, cawz camgya ciepraen le, cix youq Ginghsih Binhgvanj lauxlaux saedsaed doeg saw, caemhcaiq ngeixnaemj gij genj- caz bonjfaenh, coengzlaiz mbouj capfwngz guenj gij saeh song baij.

Mwh ciepraen, miz vunz naeuz Veiz Gozcingh dwg youq Baekging yauzgung. Cungjlij naeuz:“De mbouj capfwngz gvaq, boux dungzci neix gig souj gijliz.” Lij miz vunz naeuz: “Seizneix gwnzbiengz boq naeuz Mauz Cujsiz ciepraen gij daibyauj Yeznanz le, haenh ‘Veiz Gozcingh dwg boux dungzci ndei、dangjyenz ndei.’ Gijneix dwg luenhgangj.” Cungjlij naeuz:“Cujsiz gangj gvaq coenz vah neix. Gij dungzci Yeznanz gig aeueiq Veiz Gozcingh dungzci, de youq Yeznanz miz goenglauz.”

Caenhguenj yienghneix, bi 1967 ndwen 8 ngoenz 9 banhaemh, miz baij cujciz vunzcungq ndeu vanzlij caeuq gij baijcauhfanj Baekging doxgap hwnjdaeuj, bae aen Ginghsih Binh- gvanj bingguenj haenx daeuq Veiz Gozcingh, Veiz Gozcingh ndang deng sieng geij giz. Cungjlij rox le, minghlingh gij vunz haenx sikhaek deuz. (caengz sat)