(ciep geiz gonq) Vunz Mbanj- ndaw naeuz:“Dou mbouj miz ngaenz douzswh guh gunghcangj, hix mbouj miz gisuz guh raemxbingz, gangj ndaej ndei, guh mbouj yungzheih ha.”

Gyoengqhek naeuz: “Yienghneix ba, dou hawj sou bak fanh maenz ngaenz, sou gai aen mboq neix hawj dou, sou ciuq doenghbaez ityiengh yungh raemx dou hix mbouj aeu ngaenz sou.”

Bak fanh maenz? Mbwn ha! Gij vunzgeq ndaw mbanj caeuq geij boux daeuz mbanj dingq le, bouxboux bak aj baenz buenq ngoenz haep mbouj ndaej.

Gyoengq hek gangj daengz guh daengz, ngoenz daihngeih couh caeuq Mbanjndaw sij gai mboq habdoengz, ngoenz daihsam couh dawz ngaenz bued hawj Mbanjndaw, ngoenz daihseiq couh baij vunz haeuj mbanj daeuj haihong guh ranz.

Yaepseiz, Mbanjndaw sing ci yiengj sing vunz hemq, nauhyied swdswd.

Gienh saeh neix riuz daengz Mbanjrog lo, Mbanjrog baij goeng- daeuz ndaw mbanj ndeu daeuj gangj saeh, lij dwg heuh Mbanjndaw guhdoih ok ngaenz bae coih roen.

Goengdaeuz Mbanjndaw caeuq vunz ndaw mbanj doxyaeng naeuz: “Seizneix raeuz gaenq miz ngaenz lo, raeuz hix yaek aeu byaij roen, couh dawz di ngaenz ndeu okdaeuj hawj Mbanjrog guh roen ba.”

Vunz Mbanjndaw gietdingh dawz haj fanh maenzngaenz okdaeuj hawj Mbanjrog guh roen.

Mbanjrog mbouj aeu ngaenz, gyoengqde doiq vunz Mbanjndaw naeuz: “Seizneix sou gai mboq, ndaej bak fanh maenz, haj fanh maenz couh naemj cawx dou aeu roen byaij, yienghneix baenzlawz goeng- bingz, yienghneix bouxlawz doengzeiq, mbouj miz ngeihcib fanh sou couh gaej byaij roen.”

Yaek miz baenz bi seizgan, Mbanjndaw guh roen duh Mbanjndaw, Mbanjrog guh roen duh Mbanjrog, boux mbouj leix boux.

Roen guh baenz lo, Mbanjrog aeu suijniz gyaux namhsa, youq gyaeuj- mbanj couq baenz geij aen doen, aenaen hung lumj aen loz nei, dawz roen dangj hwnjdaeuj, vunz byaij ndaej ci gvaq mbouj ndaej, vunz Mbanjndaw bouxboux simnyap, youh mbouj rox baenzlawz guh ndei.

Mbanjndaw miz goeng laux ndeu bineix bak lingz song bi lo, de heuh gyoengq goengdaeuz mbanj gvaqdaeuj, caegcaeg lwnh gyoengqde gienh saeh ndeu, gyoengq goengdaeuz mbanj dingq le, bouxboux angq dwk daj gagoek.

Ngoenzlaeng, vunz Mbanjndaw daeuj daengz bien mboq, dawz ga roenraemx gaij gvaq vang bae, raemxmboq lae roengz ndaw daemz lajmbanj bae, yienghneix laebdaeb lae le haj ngoenz, ndaw daemz raemx saw bya diuq, aendaemz ndaw mbanj lumj baenz aen huz iq ndeu nei, ingj ok gij ngaeuz ranz caeuq gij byasoem daeuj, bienqbaenz aen gingj maez vunz ndeu.

Aen mboqraemx Mbanjrog youq laj dinbya, raemx daj ndaw bya lae daeuj, sawdikdik, doeng raeuj hah liengz, it bi seiqgeiq lae mbouj dingz, geij ngoenz neix miz saeh geizheih ok lo, raemxmboq yied lae yied noix, doeklaeng gaenq mbouj caiq lae raemx lo, vunz ndaw mbanj gaenq geij ngoenz mbouj miz raemx yungh .

Vunz Mbanjrog youq mbouj ndaej lo, baij goengdaeuz mbanj ndeu daeuj daengz Mbanjndaw, naeuz: “Raeuz beixbeix nuengxnuengx, haet doiq da haemh doiq naj, sou baenz- lawz ndaej gyaeng raemx hwnjdaeuj mbouj hawj dou yungh ni?”

Goengdaeuz Mbanjndaw naeuz: “Roenraemx roenraemx, mbouj miz roen vunz baenzlawz byaij, mbouj miz roen raemx baenzlawz lae, raeuz beixbeix nuengxnuengx, haet doiq da haemh doiq naj, sou baenzlawz ndaej gyaeng roen hwnjdaeuj mbouj hawj dou byaij ni?”

Goengdaeuz Mbanjrog dauqbae lo, heuh vunz ndaw mbanj dawz geij ndaek doen dangj roen haenx cek bae lo, daj ngoenzhaenx hwnj, Mbanjndaw haeuj ok miz roen byaij lo.

Goengdaeuz Mbanjndaw dauqbae lo, heuh vunz ndaw mbanj dawz roenraemx gaij gvaqdaeuj lo, daj ngoenzhaenx hwnj, Mbanjrog haet- haemh miz raemx yungh lo.(sat)