Aen denbinghsiengh ranz gou dwg cangzfanghhingz, miz song mij sang, bangxhenz sam mienh dwg saekhau, cingqmienh dwg saekhoengz. Youq cingqmienh denbinghsiengh lij yaenq miz duj vahenj hung ndeu, gig lwenqda.

Aen denbinghsiengh ranz gou gungh miz sam caengz. Daj gwnz daengz laj, caengz daih’it dwg caengz baujsien, caengz neix gig hung, ndaej cuengq haujlai doenghyiengh. Danghnaeuz gwnngaiz miz byaek lw, couh cuengq youq caengz neix, daengz haemh caiq dawz okdaeuj cawj, gij feihdauh caeuq gwnngaiz seiz ityiengh. Danghnaeuz gij noh ngamq cawx ma, mbouj caengz cawj daengz, hix ndaej cuengq youq caengz neix, gijgwn cuengq youq caengz neix ndaej baujsien song ngoenz, gvaq geizbaujsien le, gijgwn couh bienq vaih lo. Caengz daihngeih gig iq, cijmiz aen siengrag ndeu, caengz neix cujyau dwg baujsien gij mak, aenvih gij mak mbouj yungh cawj, cigcip cuengq haeuj ndaw bak bae gwn, danghnaeuz gij mak hix caeuq gij byaek、gij noh itheij cuengq, sigin couh doxgyuek lo, yienghneix gwn mak couh mbouj veiswngh, ndigah caengz neix aeu daeuj baujsien lwgmak dwg ceiq ndei. Caengz daihsam dwg ceiq gyoet, ndaej dawz gijgwn giet baenz nae bae, caengz neix caeuq caengz daih’it ityiengh hung. Danghnaeuz miz gijgwn cungj mbouj caengz sikhaek gwn daengz haenx, couh dawz de cuengq youq ndaw caengz neix, cijaeu denbinghsiengh itcig doeng dienh, gijgwnz neix couh mbouj bienq vaih.

Neix couhdwg aen denbinghsiengh ranz gou, aen denbinghsiengh ranz mwngz dwg baenzlawz yiengh da?（指导教师：韦 龙）