Ranznden gou ciengx miz lwg mahau ndeigyaez ndeu. Lwg ma neix daengx ndang bwn hausagsag, song duj rwz unqmemmem, doiq lwgda ndaem- ndatndat haenx baenqlulu yawj dwk seiqhenz, lumj doiq aen seiqgyaiq neix gig geizheih. Aenndaeng dumzdwddwd cungj dwg doeng nyouqnyouq sae nyouqnyouq, lumj cingq ra gijmaz doxgaiq ityiengh.

Aenrwz malwg gig lingz, cijaeu miz di sing, de couh “vouvou” dwk raeuq hwnjdaeuj. Miz seiz gou daegdaengq yengq din yaeng’yaeng byaij mbouj miz sing, hoeng lwg mahau neix lij dingq ndaej nyi.

Aenndaeng malwg hix gig lingz, naengz nyouq daengz gak cungj heiq mbouj doengz. Ngoenz ndeu banringz, gou fwngz dawz gaiq yanghcangz ndeu, ngamq byaij haeuj ndaw hongh, lwg mahau couh riengz heiqhom byaij gvaqdaeuj. De yawjraen gou gwn feihdauh raixcaix, couh iet diuz linx raezrangrang, riengz youq baihlaeng gou, lumj gouz gou hawj de gwn di nei. Yawjraen gij yienghceij de hojlienz raixcaix, gou cijndei dawz yanghcangz ndaw fwngz gveng hawj de gwn. Lwg mahau gaemz ndeu couh dawz yanghcangz gwn liux lo. Gwn sat le rizriz aenbak, ngiengx gyaeuj yawj gou mbat ndeu, yienzhaeuh couh bibi diuzrieng, byaijdedded deuz lo.

Lwg mahau gig unqswnh, gou gig gyaez de. Moix baez gou byaij gyawj de seiz, de couh mbouj dingz bi diuzrieng dongx gou. Moix baez gou yungh fwngz yaeng’yaeng lumh gwnz ndang de, de couh swnh dwk boemz youq gwnz dieg, caih gou lumh de.

Duz malwg geijlai ndeigyaez ha, youq gij saedceij ngoenznaengz gou, duz mazlwg neix daiq hawj gou haujlai yinxdaeuz!

（指导老师：邓秀妮）