Doenghbaez, duznou caeuq duzvaiz cungj dwg baengzyoux ndei bouxvunz, duzvaiz gengnaz, duznou gip haeux doek、doxgaiq nwnh caeuq sauq ranz.

gyanghongh bouxcawj seuq- supsup. Duzvaiz moix baez dauqma, din cungj miz raemx, rizdin baenz coij dumzsubsub. Gijneix bonjlaiz hix gig bingzciengz, gvaq yaephe couh hawq lo. Hoeng, duznou doiq bouxcawj gangj:“Duzvaiz mbouj maij seuqcingh, gyanghongh gauj uq le gig mbouj ndei yawj.” Bouxcawj yawjyawj gij rizdin myoxmyad, ndawsim hix miz di mbouj angq, couh heuh duzvaiz haeujsim di. Yienghneix, duzvaiz moix baez dauqma, cungj youq rog langh din hawq le cij haeujdaeuj. Hoeng, miz seiz mbouj rox din hawq caengz hawq liux couh haeujdaeuj, ndaw geh din lij miz ndik baj song ndik raemx doek youq gyanghongh. Duznou raen le couh lwnh bouxcawj. Bouxcawj dingq lai le, ndawsim couh nyinhnaeuz duzvaiz mbouj dingqvah lo.

Bouxcawj ciengx miz rwi. Duzvaiz rieng raezramram, gingciengz baet bae baet dauq, rwi lai le, mienx mbouj ndaej cungj miz saek song duz mbin gyawj rieng duzvaiz, deng baet doek roengzdaeuj, miz duz dai miz duz sieng, hix miz duz dauq mbin ndaej hwnjdaeuj. Duznou gip hwnjdaeuj, bungj hawj bouxcawj yawj, naeuz: “Duzvaiz mbouj rox baenzlawz lo, mbouj guhhong, cienmonz ra duzrwi fatheiq, yungh bak haeb、yungh ndaeng byoq、 yungh rieng baet、yungh din daemh、 daengx ndang roux, duzrwi hojlienz ha, couh yienghneix dai lo. Gou yawj de dwg fatbag lo, ngoenz lawz gojnaengz lienz gou hix mbouj miz mingh lo. Bouxcawj ha, mwngz aeu lai haeujsim di bw.” Bouxcawj cij riuriu. Mboujgvaq, ngoenzngoenz geij duz roxnaeuz cib geij duz rwi dai, bauxcawj hix sim’in lo, couh heuh duzvaiz haeujsim di.

Duzvaiz gig haeujsim lo, boux- cawj lij seiz mbouj seiz sou ndaej rwi dai.

Vaiz geb rieng guhhong, dang- yienz mbouj vuen, hix guh mbouj ndaej vaiq lo.

Bi neix, souhaeuj siuj lo, hoeng, byaekginghbwz lij heusubsub oiqoep- oep.

Nou caegcaeg youq rog seng le rouh noulwg ndeu.

Byaekginghbwz maj baenz lo. Haemh laepcupcup ndeu, caj boux- cawj cungj ninzndaek le, duznou daiq gyoengq noulwg daeuj ndaw reih gwn byaekginghbwz, hix mbouj ndeindei gwn, cij youq henzbien haeb gaiq iq ndeu, haeb vaih byaekginghbwz lo.

Bouxcawj siengj daengz gij vah duznou, nyinhnaeuz duzvaiz mbouj lumj doenghbaez sienhsoh gaenxgyaek lo, couh gyaep duzvaiz deuz lo. Duznou angq dangqmaz.

Mbouj geijlai nanz, youh haemh laepcupcup ndeu, duznou sim youh haenznyubnyub. De nyaenx mbouj ndaej lo, heuh gyoengq noulwg buenx de bae ndaw reih, guh yak guh angq. Gienh saeh neix dauqdaej hawj bouxcawj raen lo, bouxcawj gyaep duznou okbae lo.

Duzvaiz youh ndaej dauqma lo, lij gya duz meuz ndeu dem. Duzmeuz ndaej rox gij saehcingz doenghgonq le, baez raen duznou couh haeb. Cigdaengz seizneix, duznou hwnz- ngoenz sim diuq mbei mboek, ndojndoj ndumjndumj gvaq saedceij.

(Ganh Sozvwnz/甘说文 bienhoiz)