Veiz Gozcingh baez daengz Gvangjcouh, cix raen goengsoujcangj Cangh Yinzyi daemh diuz dwngx ndeu caeuq mbangj dungzci Gvangjcouh Ginhgih youq ciengzfeihgih caj de lo. Veiz Gozcingh baez roengz feihgih, cix byaij coh Goengcangh, dongx de gonq. Goengcangh riunyum dwk caeuq Veiz Gozcingh gangj:“Gozcingh dungzci, mwngz souhhoj lo!” Veiz Gozcingh naeuz: “Goengcangh, gijhaenx mbouj suenq saeh maz! Mwngz yaek re ndei ndangdaej bw!” Goengcangh youh daegbied daengq boux bingre Veiz Gozcingh naeuz: “Daegdwng, mwngz aeu baujhoh ndei de, de dwg boux vunz miz goenglauz ndeu! Dwg dou gaxgonq daiq de okdaeuj, seizneix youh ndaej doxraen dem, gou angq lai!”

Gij goengdaeuz Gvangjcouh Ginhgih yiengq Veiz Gozcingh cienjnaeuz le cunghyangh gvendaengz yaek youq Guengjsae guh cienzmienh bingguenj、youz Veiz Gozcingh guh boux cujyin hoihbingguenj gij eiqdoz neix, caemh naeuz Gvangjcouh yaek baij vunz bae Namzningz, caeuq Guengjsae Ginhgih doxcaez guh gij hong cujciz vunzlai caeuq bouxdaeuz diegfueng haenx, dingjrengz de oknaj.

Boux fucwng’veij Gvangjcouh Ginhgih Cinz Hungzfaz daeuj daengz Namzningz guh hong, mbangj cujciz vunzlai caeuq dingzlai goengdaeuz cungj dingjrengz Veiz Gozcingh oknaj, hoeng caemh miz di cujciz vunzlai ndeu genhciz dub laemx Veiz Gozcingh. Cunghyangh doeklaeng cix vut gij dajsuenq cienzmienh bingguenj Guengjsae haenx bae lo.

Veiz Gozcingh youq Gvangjcouh ndaej mboengq ndeu le, cix ciep ndaej aen doengcei cunghyangh, heuh de bae Baekging camgya hoih ginhveij gozda veiyi. Seizhaenx de giem guh boux cwng’veij daeuzit Gvangjcouh Ginhgih, budui cix soengq geu buhbing gvaqdaeuj hawj de.

De dauqcungz ndaej daenj buhbing, daj Gvangjcouh bae daengz Baekging, camgya aenhoih cungh- yangh ginhveij gozda veiyi neix.

Hai hoih sat le, Couh Cungjlij anbaiz youq Ginghsih nhgvanj, caemhcaiq baujhoh de.

Ndwen 4 ngoenz 19, youq boux gicej Cujsaeq Vwnzgwz Cunghyangh baij bae ndeu yukyon lajde, Swcigih Dangjveij miz sam boux goengdaeuz fatbiuj singmingz, goenghai dingjrengz mbangj cujciz vunzlai caeuq hungzveibingh cauh- fanj.

(caengz sat)

Veiz Gozcingh

Guengjsae Bi