Mbanjrog miz hajcib lai ranz, miz song bak lai boux vunz.

Mbanjndaw miz hajcib lai ranz, miz song bak lai boux vunz.

Mbanjrog seiqlengq dieg bingz, mak baenz haeux fag.

Mbajndaw seiqlengq dwg bya, faex hung ndoeng laep.

Mbanjrog liz goengloh cib lai goengleix, bingzseiz mbouj miz gijmaz saeh, vunz Mbanjrog gig noix bae Mbanjndaw.

Mbanjndaw liz Mbanjrog cib lai goengleix, mboujlwnh bae mbanj roxnaeuz bae haw, vunz Mbanjndaw aeu ginggvaq Mbanjrog guh roen, hix couh dwg naeuz, vunz Mbanjndaw naemj daj ndaw mbanj bae daengz bien goengloh, cawz le lai byaij cib lai goengleix roen daengz Mbanjrog le, lij aeu caeuq vunz Mbanjrog doengz byaij cib lai goengleix roen.

Diuz roen neix dwg roen naemh, daj ciuhgeq roengzdaeuj couh yienghneix, gvangq mbouj daengz sam cik, ngoenz ndit naemhfoenx rim mbwn, ngoenz fwn namhboengz rim ga, song aen mbanj seiq bak lai vunz ngoenzngoenz baebae dauqdauq, mbouj miz saek boux mbouj nam ga roen neix hoj byaij.

Mbanjrog gietdingh heuh vunz mbanj gien ngaenz caep roen moq, dawz duenh roen yiet bae coh goengloh neix caep baenz roen suijniz.

Mbanjndaw hix gietdingh heuh vunz mbanj gien ngaenz caep roen moq, dawz duenh roen yiet bae coh Mbanjrog neix caep baenz roen suijniz.

Vunz Mbanjrog doxyaeng naeuz: Mbanjndaw hix caeuq raeuz doengz baij duenh roen neix, gyoengqde hix wnggai caeuq raeuz ok ngaenz.

Vunz Mbanjrog couh baij boux goengdaeuz ndawmbanj ndeu bae daengz Mbanjndaw, naeuz yienghneix yienghneix.

Vunz Mbanjndaw doxyaeng naeuz: Mbanj raeuz gaenq lai guh cib lai goengleix roen, mbouj wnggai caiq caeuq Mbanjrog ok ngaenz caep roen lo.

Goengzdaeuz Mbanjndaw couh daengz Mbanjrog daeuj, naeuz yienghneix yienghneix.

Haihong caep roen moq lo, Mbanjrog daj bien goengloh coh ndaw mbanj guh daeuj, Mbanjndaw daj ndaw mbanj coh Mbanjrog guh bae, gwnz song duenh roen neix ngoenz- ngoenz nauhyied lumj ngoenzhaw.

Goj gangj daengz gizneix, raeuz caiq heij goj wnq.

Baihlaeng Mbanjndaw miz aen mboqraemx ndeu, aenmboq seiqhenz faex hung mwncupcup, gaeugeq doxsan lumj muengx, raemx daj gemhdat lae okdaeuj, saw dikdik, doeng raeuj hah liengz, bi seiq geiq lae mbouj duenh. Vunz Mbanjndaw daj ciuhgeq roengzdaeuj couh dwg gwn yungh gij raemx aen mboq neix.

Ngoenz ndeu, Mbanjndaw daeuj le seiq haj boux hek, bouxboux raek gingqda, gyoengqde daengz bien moq, daek aeu song bingz raemx couh dauqbae lo.

Vunz Mbanjndaw mbwn rongh bae guhhong, haemh laep haeuj rug ninz, mbouj miz bouxlawz dajleix gij vunz haeuj ok neix, hix mbouj miz bouxlawz rox gij vunz neix haeuj mbanj daeuj guh gijmaz.

Vunz Mbanjndaw fangzhwnz hix naemj mbouj daengz, gyoengqde yaek fat daihcaiz lo, gyoengq hek haeuj mbanj daeuj haenx, dwg naemj youq Mbanjndaw guh aen gunghcangj ndeu, aeu gij raemx aenmboq Mbanjndaw guh baenz raemxbingz dawz bae gai.

Gienh saeh neix yaepyet couh riuz doh Mbanjndaw lo. Miz vunz ndawmbanj naeuz, raemx dwg raemx raeuz, baenzlawz hawj vunz aeu bae guh seng’eiq lauz ngaenz canh ni? Miz mbangj naeuz: Mbouj hawj raeuz cib lai ngeih cib fanh maenz ngaenz, mbouj hawj daeuj aeu gij raemx raeuz.

Gvaq le geij ngoenz, geij boux hek haenx youh daeuj daengz Mbanjndaw, gyoengqde caeuq gij vunzgeq ndaw mbanj caeuq geij boux daeuz Mbanjndaw doxyaeng naeuz: “Seizneix gij raemx baenz bingz gwnz haw baij gai haenx, baenzlawz gangj hix mbouj beij gij raemx aenmboq raeuz ndei, danghnaeuz raeuz guh aen gunghcangj caux raemxbingz dawz okbae gai, seng’eiq itdingh mbouj loek.”

(caengz sat)