Daj daxmeh gou seng daeg- nuengx gou le, gou roxnyinh lumj- baenz daxmeh cij gyaez daegnuengx, mbouj caiq gyaez gou nei, mbouj dawz gou dah lwgmbwk neix cuengq youq ndawsim, gou gamjdaengz gig nanzgvaq.

Couh aeu ngoenzneix daeuj gangj, daxmeh daj haw cawx ndaej song aen sae’gva mbouj suenq hung ma, gwn caeuz gvaq le, daxmeh dawz aen sae’gva buq baenz roek gaiq, gaiq he baen hawj daxbuz, gaiq he baen hawj daxgoeng, gaiq he baen hawj daxboh, gaiq he baen hawj daxmeh swhgeij. Lij miz song gaiq, gaiq he hung, gaiq he iq. Gou iet fwngz bae aeu gaiq hung, mboujliuh daegnuengx hix iet fwngz bae aeu gaiq hung. Vih neix dou couh doxceng hwnjdaeuj. Daxmeh raen le, couh ndaq gou naeuz:“Mwngz dwg dahcej, wnggai nyiengh hawj daegnuengx cij deng, gaiq hung neix couh hawj daegnuengx, caiq gangj lij miz aen sae’gva dem!” Dingq daxmeh gangj le, gou mbouj fugheiq:“Mbouj ndaej, gou couh aeu gaiq hung neix.” “Mwngz mbouj dingq vah, gou couh aeu song gaiq neix cungj hawj daegnuengx caez bae.”

Gou dingq daxmeh gangj le, fwt dwk daej nga’nga hwnjdaeuj: “Sou bouxboux cungj gyaez daegnuengx, yienghyiengh cungj nyiengh hawj daegnuengx, gaemz heiq neix gou nyaenx baenz bet bi lo.” Gangj sat, couh byaij haeuj ndaw rug swhgeij, haenqrengz gven aendou.

Gyanghaemh, gou itcig ninz mbouj ndaek, couh dawz bonj saw he daeuj yawj, sawqmwh, gou dingqnyi miz vunz hai dou, couh vaiq cuengq saw, gyajcang ninzndaek. Dou hai le, daxmeh menhmenh byaij daengz najcongz, lumh aengyaeuj gou, sing iq gangj:“Mbouj dwg daxmeh biensim, mwngz caeuq daegnuengx cungj dwg lwg daxmeh, daxmeh cungj gyaez gyoengqsou, caiq gangj daegnuengx mwngz lij iq, mbouj roxsoq, dangh- naeuz mwngz mbouj nyiengh hawj de, de couh daej mbouj dingz. Gou rox mwngz gig vei, ngoenzcog couh baen gaiq sae’gva hung hawj mwngz.”

Dingq gij vah daxmeh le, gou gig gamjdoengh, raemxda caiq hix nyaenx mbouj ndaej lae okdaeuj lo. Gou goengq hwnjdaeuj gotdawz daxmeh, daejsaekwk dwk gangj: “Daxmeh, gou mbouj roxsoq, gou loek lo, cingj mwngz yienzliengh, baezlaeng gou aeu lai nyiengh daegnuengx di, caiq hix mbouj caeuq daegnuengx doxceng lo.” Dingq gou gangj gij vah neix, daxmeh got dawz gou ndaetndetndet.

(指导教师：韦 龙)