Buengjyiengh ndawsim gou, couhdwg song boux vunz daj gou seng okdaeuj couh itcig buenx youq henzndang gou haenx.

Gyoengqde dwg song boux vunzguhnaz, mboujguenj rumz ci fwn doek roxnaeuz ndithaenq hwngqndat, gyoengqde cungj bae ndaw reih ndaw naz guhhong. Moix baez deng fagliemz gvej deng fwngz seiz, gyoengqde cungj dwg nyaenx youq, mboujguenj baenzlawz indot gyoengqde mbouj damz mbouj heuh, haeb faenz haeb heuj dingj gvaqbae:“Mbouj youqgaenj law, di sieng neix mbouj suenq gijmaz ne!” Yienzhaeuh laebdaeb guhhong. Moix baez gou yawjraen cungj cingzgingj neix couh nyaenx mbouj ndaej gamjdoengh dwk lae roengz raemxda.

Seizhah banringz ndithaenq raixcaix, hoeng, gyoengqde lij youq ndaw reih ndaw naz guhhong mbouj dingz. Geubuh deng hanh cimq dumz lo, couh lumj ngamq swiq ityiengh, hanh ndik roengz namh bae, gomiuz docih gyoengqde. Danghnaeuz fwn doek, gyoengqde couh daenj buhfwn itcig guh hong liux cij ma ranz.

Dang gou roebdaengz gunnanz doeknaiq seiz, siengj daengz gyoengqde, daengx ndang couh bienq ndaej rengzrwdrwd. Gou ciengzciengz siengj, danghnaeuz gou dwg aenruz youq gwnz haij mbouj rox fuengyiengq, gyoengqde couhdwg aen daengdap yinxroen; danghnaeuz gou dwg bouxvunz youq gwnz roenbuet mbouj miz saenqsim, gyoengqde couhdwg gij rengzrwd hawj gou buet baenaj haenx……

Gyoengqde couhdwg song boux hawj gou sengmingh haenx—— daxboh daxmeh gou. Dwg gyoengqde son gou baenzlawz guh vunz, roebdaengz gunnanz le, baenzlawz bae genhciz bae haekfug, gyoengqde couhdwg buengj- yiengh ndawsim gou.（指导老师：陆全耀）