Ranz gou ciengx miz sam duz byagim, gou gig gyaez gyoengqde, moix ngoenz cuengqhag dauqma, gou cungj aeu liuhbya daeuj gueng byagim, lij bang gyoengqde vuenh raemx dem.

Byagim miz doiq lwgda hung luenzlulu ndeu, bingzseiz cungj gyaez yawj bae yawj dauq, gyaepbya raeuzrwdrwd, ronghndit baez ciuq daengz, couh ronghmyabmyab, gig ndeiyawj. Youzdoengh seiz, diuzrieng gyoengqde vad bae vad dauq, gig nyex vunz gyaez.

Geiq ndaej miz baez ndeu, gou ra bonjsaw gou mbouj raen lo, gig hozndat, youq henz gangbya daemh din baet fwngz, byagim lumj dwg rox simsaeh gou ityiengh, vaiqvued dwk youz daengz bangx gangbya, doq vad diuzrieng doq boq aenbop, lumj dwg lwnh gou nyi: “Vunzcawj ha vunzcawj, bungz daengz gijmaz saeh nyap la, gaej hozndat bw, aeu ndeindei siengj banhfap gaijgez cij ndaej, hozndat sieng daengz ndangdaej bw.” Yawj daengz cungj cingzgingj neix, heiqndat gou roengz lo, mbouj caiq hozndat lo.

Byagim lij gig mizyinx, gyoengqde gwn doxgaiq lij aeu yawj vunz gvaq caiq gwn, danghnaeuz dwg bouxwnq gueng gyoengqde, gyoengqde couh mbouj angq lo, couh mbwnj aenbak, youz deuz lo. Danghnaeuz dwg gou gueng gyoengqde ha, gyoengqde couh bien gwn bien yawj gou, mizseiz lij ndonj ok najraemx daeuj boq bopraemx, baez baet rieng, youh gig vaiq youz daengz daejgang.

Gou gig gyaez byagim, gyoengqde daiq hawj gou haujlai vaiqvued, baezlaeng gou lij aeu engqgya saeqsim bae ciuqgoq gyoengqde.(指导老师：韦丽平)