3 nyied 3 hauh lajbyonghngoenz, Daengx Guek Cwnghez Daihcibngeih Gaiq Daihsam Baez Veiyi youq Yinz- minz Daveidangz ciuhai.

Ngoenzde, doenghboux lingjdauj dangj nem guekgya Siz Ginbingz、Lij Gwzgyangz、Cangh Dwzgyangh、Liuz Yinzsanh、Vangz Gizsanh、Cangh Gauhli daengj naengh gwnz cujsizdaiz, hoh baez daihhoih neix ciuhai. Yiz Cwngswngh daibyauj cwnghez daih- cibngeih gaiq daengx guek veijyenzvei cangzvu veijyenzvei, youq gwnz hoih guh gunghcoz baugau.

Daengx Guek Cwnghez fucujsiz Ciz Gicinh gangj le gij cingzgvang gvendaengz hong daezanq daj cwnghez daihcibngeih gaiq daihngeih baez veiyi daeuj. Bi ndeu gvaqdaeuj, cwnghez gungh gyau daezanq 6101 gienh, ndawde, daihhoih daezanq 5875 gienh, bingzseiz daezanq 226 gienh. Ginggvaq saemjcaz, laeb’anq 5052 gienh. Gyonj daeuj gangj, gij daezanq neix neiyungz lai、cungdenj yienhda, vwndiz gangj ndaej cingcuj, daejyienh le doenghboux cwnghez veijyenz、cwnghez gak camgya danhvei gig rox rapdawz cwzyin naek、rox sijming youqgaenj. Daengz 2 nyied 20 hauh, gaenq banh nem handap sat daezanq 5046 gienh, beijlaeh dabdaengz 99.8%.

Baez hoih neix gungh hai 10 ngoenz, 2100 lai boux cwnghez veij- yenz camgya. (ciuq Sinhvazse)