Daih’it, boux baenz bingh ok lwed geih gwn bya lai. Boux hezsiujbanj gemjnoix、boux baenz binghhezyouj、boux ndang noix veizswnghsu K daengj bingh ok lwed aeu noix gwn roxnaeuz mbouj gwn bya. Baez gwn roengzbae, sailwed iq couh ok lwed mbouj dingz, bingh engq haeujnaek.

Daihngeih, boux baenz bingh- gezhwz gwn yw seiz geih gwn bya. Boux baenz binghgezhwz gwn bya rox fatseng gominj fanjying, baenz mbaeu cix rub myaiz、gyaeuj dot、naengnoh nding cumx、muek gokda cunglwed daengj; baenz naek cix sim linj、naengbak caeuq fajnaj mwnh gawh、hwnj cimj、siqdungx、dungx in、diemheiq sinhoj、hezyaz swng sang, caemhcaiq yaeuhfat baenz hezyaz sang yungyiemj caeuq uk ok lwed.

Daihsam, boux baenzin geih gwn bya. Gohyoz daih neix yenzgiu ndaej rox, ndaw nohbya hamz miz byauling doxgaiq, boux baenzin cix dwg aenvih byauling ndaw ndang baiz ok mbouj ndei yinxhwnj, cujyau biujyienh dwg niusonh ndaw lwed hamzliengh sang lai. Ndigah, boux baenzin gwn bya rox hawj bingh engq haeujnaek.

Daihseiq, boux baenz daep ndongj geih gwn bya. Ciuq gohyoz faensik, baenz daep ndongj seiz lwed ndaw ndang nanz gietgongj, gyahwnj hezsiujbanj bien daemq, gig yungzheih ok lwed, danghnaeuz caiq gwn byasahdinghyiz、byaheu、byaginh- canghyiz roengzbae dem, bingh couh engq haeujnaek. Byaleix、byamuzyiz hix wnggai noix gwn roxnaeuz mbouj gwn.

Daihhaj, boux ndang hwnjnwnj geih gwn bya. Nohbya yingzyangj lai, hamz miz cujanhsonh hix lai, mwh gij danbwzciz neix haeuj ndang bae le, cuengq ok cungj doxgaiq hwnjnwnj ndeu, doeklaeng yinxhwnj ithaehlied gominj fanjying.

Daihroek, boux maen geih gwn bya. Yenzgiu ndaej rox, bouxsai gwn bya lai seiz, ciengz dwg swnghyuz naengzlig doekdaemq. Aenvih ndaw ndang duzbya hamz gung beij gung ndaw raemx lai, mwh gung haeuj daengz ndaw ndang vunz bae le, ndaej cigciep caeuq hungzsibauh ndaw lwed giethab, gitgaz swnghciz sibauh goengnaengz. Ndigah, nohbya yienz- naeuz ndei gwn, boux maen wngdang geih gwn nohbya.