Bi’gvaq seizcin, miz ngoenz ndeu, fwn doeksidsid, youq ndaw fwn iq deihnyaennyaen haenx, gwnz gai vunz yied byaij yied noix lo, gou hix ngaem gyaeuj gipmuengz ganj baema. Sawqmwh, gou bungq deng boux vunz ndeu lo, gou gipmuengz ngiengx gyaeuj hwnjdaeuj, yawjraen boux vunz deng gou bungq haenx saemxsax mbat he, ceng di laemx roengz. “Doiq mbouj hwnj, doiq mbouj hwnj!”Gou lienzmuengz gangj.

Youq ndaw fwn, gou raen de aenndang hungrauh, naj byombet, doiq lwgda mbouj miz saenz haenx, dinghdingh yawj baihnaj. Yenzlaiz de dwg boux damengz, gou ndawsim gamjdaengz gig doiq mbouj hwnj de, lienzmuengz gangj:“Bohlungz, gou soengq mwngz baema ba!” “Siuj doengzhag, docih mwngz lai lo.”Boux vunz haenx lienzmuengz gangj.

Gou rex de byaij bae baihnaj. Sawqmwh, din gou dik deng ndaek doxgaiq ndeu, ceng di deng laemx. Gou ngaemgyaeuj baez yawj, yenz- laiz dwg aen fa goemq conghcingj baiz raemx ndeu. Gou gag ndaq naeuz:“Yak raixcaix! Byawz dawz fa biengj hai le mbouj goemq ndei dauq! Bohlungz, mwngz daj gizneix byaij, siujsim bw.”Cij raen de byaij yamq he, youh dingz roengzdaeuj, de maeuq roengzdaeuj, dawz diuzdwngx ndaw fwngz cuengq youq gwnz dieg, doq aeu fwngz mo ra aenfa, doq gangj：“Lij miz vunz daj gizneix byaij, aeu goemq ndei aenfa cij ndaej.”Cij raen de siujsim sisi dwk dawz aenfa goemq ndei le, cij menh- menh ndwn hwnj- daeuj. Seizneix, sim gou bae ndat, lwgda gou dumz lo.

Fwn iq lij doek mbouj dingz, gou rex de laebdaeb byaij bae baihnaj……Youq gwnz diuzloh ndaw fwn, gou vih de yinxloh, hoeng youq gwnz diuzloh ciuhvunz gou, de——boux damengz ndeu, cix dwg bouxvunz yinxloh gou.

Yienznaeuz gienh saeh neix gaenq gvaqbae bi ndeu lo, hoeng de itcig gamjdoengh gou, gou itcig geiq youq ndawsim.

（指导老师：陆雪燕）