Ranz gou miz duz vaizlwg ndeu,de ndang cangq miz rengz, seiq cik ga lumj saeu iq, bwn youh ndaem youh wenj, song diuz gaeu iq ngamq loh okdaeuj haenx hawj vunz roxnyinh geijlai gyaeundei ha, diuz rieng iq youq baihlaeng bi bae bi dauq, miz seiz bek naeng dungx gyaep nengznyaen.

Gou caeuq vaizlwg dwg baengz- youx ndei. Vaizlwg baez raen gou daeuj, couh lumj vunzcaen haujlai nanz mbouj raen naj nei, fat ok gij sing gig caenciet. Vaizlwg daj bak riengh iet gyaeuj okdaeuj, conghndaeng byoq heiq yiengjfofo, iet linx okdaeuj riz fwngz gou. Gou baez bae riengh vaiz yawj de, cungj daiq di nywjheu hawj vaizlwg gwn. Vaizlwg baez yawjraen nywjheu youh oiq youh singjsien, couh iet linx okdaeuj dawz nywj gienj haeuj ndaw bak bae geux “coco”, vaizlwg gwn ndaej gig feihdauh. De doq gwn nywj, doq mbouj dingz ngiengx gyaeuj hwnjdaeuj, yungh cehda gamjgik muengh gou, lumj naeuz:“Bouxcawj iq, docih mwngz!”

Baez daengz singhgizroek, gou couh yien vaizlwg bae daengz henz reihnaz gwn nywjoiq. Mwh de gwn ndaej miz feih, gou couh laeglemx gwih hwnj gwnz ndang vaizlwg bae, vaizlwg gwn nywj, gou gwih vaiz ciengq go dwk, angqyangz raixcaix.

Duz vaizlwg ranz gou caen dwggyaez ha!

（指导老师：庾书扬）