Miz vunz aeu lauxsae beij guh boux ganq suenva, ganq dujva guekcoj; miz vunz aeu lauxsae beij guh labnding, ciuq rongh bouxwnq, gag coemh swhgeij…… Gou fouzfap yungh gij swz ndei gawq ndei daeuj sij gij cingzeiq gou doiq lauxsae gingqgyaez haenx, danhseih, gou yaek caensim doiq Vangz lauxsae gangj coenz ndeu:“Vangz lauxsae, gou gyaez mwngz!”

Geiq ndaej miz baez deu, dienheiq gig nit, hoeng gou cij daenj geu buh mbangmbit ndeu. Vangz lauxsae raen le cam:“Yi Hungz, dienheiq baenzneix nit, mwngz daenj ndaej baenz noix, nit mbouj nit ha?” Gou gangj: “Mbouj nit.”Vangz lauxsae lij mbouj cuengqsim, de youh daeuj lumhlumh fwngz gou gangj:“W, fwngz lij gig raeuj! Baezlaeng dienheiq nit le aeu geiq ndaej daenj buh lai di.”Gangj sat de cij cuengqsim byaij bae.

Vangz lauxsae mboujdanh gvensim gij swnghhoz gou, doengz- seiz lij gvensim gij hagsib gou. Miz baez ndeu geizbyai gaujsi, Vangz lauxsae youq gaujsi gaxgonq daengq gou aeu nyinhcaen fuzsiz, mbouj aeu lujlaj. Hoeng gou cix hawj de saetmuengh lo, mwh gaujsi gou mbouj yawj daezmoeg cingcuj couh sij lo, doeklaeng deng gaeu bae haujlai faen. Vangz lauxsae vihliux hawj gou geiq aen hit neix, couh vahnaek cingzlaeg doiq gou gangj: “Yi Hungz ha, baezlaeng aeu nyinhcaen ha, mboujne mwngz couh gwnvei lo.”Dingq gij vah Vangz lauxsae le, gou najmong dangqmaz, gietsim gaij aen gezdenj neix bae, aeu saeqsim bae guh cozyez bae gaujsi.

Vangz lauxsae lumj daxmeh nei gvensim gou, son gou doegsaw guhvunz. Gou daj ndawsim bae gyaez de.（指导老师：罗 凤）