Gou caeuq Siujbingz dwg doengz ban doengzhag, cingzcik de itcig mbouj ndei, moix baez gaujsi cungj mbouj ndaej faen lai, dwg ban dou boux ceiq ca ndeu, lauxsae ciengzciengz heuh de daengz bangunghsiz naeuz de aeu roengzrengz doegsaw, danhseih mbouj miz yungh, moix baez gaujsi lij dwg ndaej faen noix.

Miz ngoenz ndeu, hai banhoih seiz, lauxsae cam daihgya:“Bouxlawz nyienh bangcoh Siujbingz doengz- hag?” Cam gvaq le, gou caeuq banhcangj doengzseiz yaengx fwngz hwnjdaeuj, hoeng gig vaiq youh cuengq roengz lo. Seizhaenx, gou couh siengj: Bang roxnaeuz mbouj bang ne? Bang de le, nguh mbouj nguh daengz cingzcik gou? Danhseih lauxsae youh ciengzciengz son dou aeu doxbang. Yawj aen naj lauxsae caj dou bang de haenx, gou youh yaengx fwngz hwnjdaeuj. Couh yienghneix, gij yinvu bang Siujbingz hagsib couh doek youq gwnz ndang gou lo.

Ciep aen yinvu neix le，gou moix ngoenz couh okdaez hawj Siujbingz guh, roxnaeuz son de doegsaw、 boih saw, roxnaeuz caeuq de itheij guh cozyez. Siujbingz hix siengj vaiqdi riengz ndaej hwnj gyoengq doengzhag, moix ngoenz de cungj roengzrengz hagsib.

Mbouj rox bouxlawz lwnh hawj bohmeh gou dingq. Daxboh hix caeuq gou gangj:“Mwngz moix ngoenz cungj bang Siujbingz, nguh mwngz hagsib lwi? Cingzcik mwngz doekroengz le baenzlawz guh?” Gou couh doiq daxboh gangj:“Gou dwg hagsib veijyenz , wnggai bang de, gou bang de seiz gou hix ndaej cinbu lo, sou couh cuengqsim ba!” Dingq gou gangj le, daxboh hix mbouj gangj gijmaz lo.

Ginggvaq roengzrengz duenh seizgan ndeu, Siujbingz doegsaw swnh lo, guh cozyez hix deng lai lo. Cingzcik de daezsang haujlai. Cingzcik gou ne, mboujdanh mbouj doek roengzdaeuj, lij miz cinbu dem bw.

Yawj daengz Siujbingz gauj ndaej cingzcik ndei, lauxsae hix gig angq. Miz baez ndeu, lauxsae nyaenx mbouj ndaej cam gou:“Mwngz dangseiz vih gijmaz nyienh bang de?” Gou dap naeuz:“Aenvih de dwg boux doengz- hag ban raeuz, de dwg doengzhag gou.”

Lauxsae riu lo, gou hix riu lo.

（指导老师：罗少维）