Seizcin rumnywj gofaex did mbaw maj hoengh, aenbwt bouxvunz caeuq rumnywj gofaex doxlumj, seizcin aeu ciengx bwt hoh bwt. Cunghyih genyi naeuz, seizcin ciengx daep hoh daep aeu lai gwn raemx, siuj gwn laeuj, baujciz gwnndoet dox- daengh, lai yindung, baujciz simcingz vaiqvued hailangh.

Lai gwn raemx. Ngamq haeuj seizcin mbwn lij nit, ndang vunz yungzheih hawqsauj noix raemx, lai gwn raemx ndaej bouj raemx hawj aenndang, hawj lwed lae baedauq ndei, coi ndang vunz sup haeuj caeuq baiz ok, gemjsiuj huqdoeg youq ndaw ndang sonjhaih aen’daep.

Gwnndoet aeu doxdaengh. Conhgyah naeuz, boux aen’daep mbouj ndei gaej lanh gwn lanh ndoet, hix gaej ciengzgeiz ngaiznyed dungx iek. Mboujnex, yungzheih yinxhwnj raemxsiuvaq iemqok mbouj doengz bingzciengz, cauhbaenz goengnaengz aen’daep saetdiuz. Ndigah, seizcin gwnndoet aeu baujciz doxdaengh, gij bijli ndaw gijgwn hamz danbwzciz、dansuij vahozvuz、youzlauz、veiz- swnghsu caeuq gvangvuzciz aeu bauj- ciz hab’wngq; gaej bien gwn genj gwn; caenhliengh noix gwn gijgwn manhget, lai gwn byaekheu singjsien caeuq lwgmak.

Noix gwn laeuj. Ngamq haeuj seizcin mbwn lij nit, gwn di laeuj ndeu ndaej doeng ging、vued lwed、vaq cwk, mizleih heiqyiengz aen’daep swngfat, danhseih mbouj ndaej gwn gvaqmauh, gwn lai rox sieng aen’daep. Ciuq yihyoz yenzgiu ndaej rox, boux vunz ndang ndei ndangnaek miz 60 goeng- gaen, moix ngoenz cijnaengz baiz ok 60 gwz ciujcingh, naengh gwn lai couh rox yingjyangj aen’daep gengangh, caemhcaiq rox cauhbaenz ciujcingh dengdoeg, sengmingh miz yungyiemj.

Simcingz aeu vaiqvued hai- langh. Conhgyah naeuz, siengj hawj aen’daep gengangh, daih’it dwg gaej fatheiq, couhcinj fatheiq hix gaej mauhgvaq 3 faen cung, aeu caenh- liengh guh daengz sim bingz heiq huz、vaiqvued hailangh、gaej youcaeuz gvaqbouh.

Habliengh yindung. Ngamq haeuj seizcin mbwn raeuj lij nit, wnggai habdangq ok rog ranz bae yindung, lumj okbae youzlangh、cuengq yiuhrumz、menhbyaij、menh- buet daengj. Aeu haeujsim dwg, yindung gaej haenq lai, gaej hanh lae hanh roenx, heiq baegfofo, mboujnex, heiqyiengz sied bae lai, doiq ciengx ndang mbouj miz ndeicawq.