Ndwencieng daengz lo, bouxlaux lwgnyez bouxboux angqangq yangzyangz, ranzranz cungj baet ndaw ranz seuqseuq saksak, daihgya nem doiq nem veh, cang aenranz ndaej gyaeugetget, gij nienzhuq doi rim ndaw ranz.

Gwn caeuzndaep le, daengx ranz vunz couh naengh youq naj densigih yawj ndwencieng lenzvanh vanjvei, gij cezmuz ndaw densi gig ndei yawj, miz mbangj cezmuz daeuq dwk daihgya riuhaha. Daengz cibngeih diemj cung, sing bauqrengh cungj bibi baba yiengj hwnjdaeuj, ranzranz cungj cuengqbauq daeuj soengq bi gaeuq coux bi moq. Mwngz yawj, bouxhung cingq cuengq gak cungj bauqrengh、bauqciengh、bauqva. Gyoengq lwgnyez hix mbouj nyinh saw, daihgya comz youq giz ndeu, cuengq bauqbaenq、bauqhabfeiz、 bauq- ienva …… bouxboux angqfaengfaeng, gvaqyinx dangqmaz.

Ndwencieng coit, gyoengq lwgnyez caeuxcaeux couh hwnqdaeuj caeuq daxgoeng daxbuz daxboh daxmeh baiqnienz, doiq bouxlaux gangj vah gitleih, bouxlaux couh hawj cienz- nyokmaj hawj lwgnyez, maqmuengh lwgnyez maenghcangq majhung.

Gvaq cieng lo, gou youh maj hung bi ndeu lo, gou wnggai engqgya rox saeh lo, gou itdingh roengzrengz doegsaw, engqgya hauqswnh bohmeh, mbouj hawj bohmeh saetmuengh. （Dahyen）