Roeggyaeujhau maj ndaej gyaeu- ndei raixcaix, sing goksak, hix gig coengmingz, danghnaeuz nyinhcaen bae hag bae guh, mbouj lau guh mbouj baenz, hoeng, de gik lai, ngoenznaengz cij haengj guhcaemz guh’angq.

Ngoenz ndeu haetcaeux, roeg- gyaeujhau caengz ninz hwnq couh dingqnyi daj gyangmbwn cienz daeuj singgo ndei dingq. Yienzlaiz dwg roegvenz canghfwen! Yawj, gij bwn roegvenz lumj aen mauh nei, geijlai lengj, aenbak de soemset ajaj haephaep, gij sing go ndeidingq laebdaeb danh ok bak daeuj, hawj vunz dingq ndaej cungj maez bae. Roeggyaeujhau boiqfug dangqmaz, hozhaenz raixcaix, de hix siengj guh boux canghfwen ndeu.

Roeggyaeujhau riengjret mbin gvaqbae baiq roegvenz guh lauxsae. Roegvenz naeuz: “Yawj mwngz maj ndaej baenzneix gyaeundei, sing goksaksak, cingq ngamj guh boux canghfwen ndeu ne!” Gangj gvaq couh son roeggyaeujhau lienh ciengq go.

Ngamq hainduj, roeggyaeujhau lij gig nyinhcaen, hoeng, cij gvaq song sam ngoenz, de couh dingj mbouj ndaej lo. Aenvih roegvenz lauxsae gangj, itdingh aeu ngoenzngoenz hwnq caeux lienh sing. De yiemz sinhoj lai, mbouj siengj hag ciengqgo lo, couh caegndot lizhai roegvenz lo.

Roeggyaeujhau gig siengj cang- lengj, de yawjraen roegmauh dawz bwngyaeuj roi ndaej lumj aen mauh sang ndeu lengjlili, roegciu rox veh doz, caemhcaiq dawz bwnda veh ndaej youh gungj youh raez gig ndeiyawj, de hix siengj haghag canglengj, haghag veh doz. Hoeng, roegmauh naeuz moix ngoenz haethaemh cungj aeu nyinhcaen roi bwn guh fazhingz, lij aeu caemcingx gaej luenh doengh, banhwnz ninz le hix aeu haeujsim, mbouj hawj bwngyaeuj luenh. Roegciu hix gangj, veh bwnda veh doz cungj aeu naihsim haeujsim, lij aeu moix ngoenz gaem bit daeuj lienh veh cij ndaej. Roeggyaeujhau baez raen gyoengq roeg bae guhcaemz guh’angq, couh hozhaenz nyaebnyaeb, baenzlawz lij hag ndaej canglengj, engq mbouj yungh dwen veh doz lo.  

Roeggyaeujhau youh raen roeg- gacak caux rongz, de nyinhnaeuz hag rox caux rongz haemq miz yungh, couh buet bae caeuq roeggacak hag caux rongz. Roeggacak gangj: “Caux rongz aeu gwn ndaej hoj, mwngz dingj ndaej lwi?” “Gou itdingh dingj roengzbae!” Roeggyaeujhau han ndaej genggywt- gywt. Yienghneix, roeggyaeujhau couh caeuq roeggacak guhdoih mbin bae giz gyae gamz nyefaex haznyangj caeuq namhniu ma. Baenzneix cib ngoenz gvaqbae le, lij caengz guh ndaej aen rongz ndeu. Roeggyaeujhau baeg lo, mbouj naihfanz lo, youh ndek aen rongz yaek guh baenz haenx mbin deuz lo.

Roeggyaeujhau laux lo, bwn cungj hau lo, lij gienh saeh ndeu hix guh mbouj baenz, de gig ienqhoij. Seiz de miz roeglwg, couh hixnaengz youq gwnz gyaeuj lwg de louz nyaeb bwn hau ndeu daeuj daezsingj lwg de geiq maenh: Seiziq aeu gaenx di, mboujne hung le couh gijmaz cungj guh mbouj baenz.

(Ganh Sozvwnz/甘说文)