Haet seizdoeng yinxhwnj bak haemz yenzyinh gig lai, lumj boux siuvaq hidungj、 boux diemheiq hidungj、boux sailwed aensim hidungj miz bingh; boux conghbak miz bingh, mbangj boux ganjyenj ndaej bingh; boux ciengzseiz naetnaiq、boux ninz mbouj gaeuq、boux cit ien daiq lai、boux lanh laeuj; boux baenz foeg daengj, cungj rox baenz bak haemz.

Cunghyih nyinhnaeuz, ciengz- seiz baenz bak haemz, cujyau dwg aenvih caepndat yinxhwnj, ndawde baugvat daepmbei caepndat caeuq dungx ndat song cungj. Daepmbei caepndat bak haemz, gojnwngz dwg aenvih giz daepmbei baenzin yinxhwnj. Boux dungx ndat yinx- hwnj bak haemz, mbangj vunz daepmbei mbouj miz baenzin, danhseih aenvih gwnndoet mbouj hableix, gwn gijgwn manhget daiq lai, hix rox yinxhwnj bak haemz. Doengzseiz, mbangj vunz baenz binghmenhsingq (lumj boux baenz binghnyouhdangz daengj) hix rox baenz bak haemz.

Lingh fuengmienh, haujlai boux guhhong yungh uk, aenvih gunghcoz cingsaenz atlig daih, caiq gyahwnj gwnndoet mbouj ngamj、mbouj miz gvilwd、noix hozdung daengj, dungxsaej goeng- naengz saek youq, gijgwn gwn roengz dungx le dingz youq ndaw saej nanz lai, gig yungzheih canjseng caepndat, hix rox yinx- hwnj baenz bak haemz.

Cunghyih conhgyah genyi naeuz:

1、Boux baenz binghmenh- singq wnggai youq canghyw cijdauj lajde, cimdoiq fatbingh yenzyinh bae ceihyw bak haemz.

2、Boux gunghcoz atlig daih, wnggai caenhliengh hawj gwn- ndoet miz gvilwd、gwnndoet gezgou hableix, noix gwn gij huq manhget, lai gwn lwgmak caeuq byaekheu.

3、Habdangq yindung, coi siuvaq goengnaengz ndaej cingq- ciengz yinhcienq, daegbied dwg boux guhhong yungh uk haenx, aeu gyagiengz yindung caemhcaiq aeu miz gvilwd. Mwh gwn haeux seiz caenhliengh gaej siengj saeh- cingz wnq.