Daxboh ndeigyaez gou:

Mwngz ndei! Duenh neix guh- hong nyaengq lwi? Yaek daengz cieng lo, daengx ranz vunz cungj caj mwngz dauqma itheij gwn donq haeux dox- comz ne. Deng lo, dingqnyi naeuz giz mwngz siethau mbinfoenfoen lo, daxboh mwngz aeu lai daenj buh raeuj ndang, gaej deng dwgliengz nw. Daxboh, daxmeh naeuz caj mwngz dauqma le, raeuz couh duk faengx、 guh ceiz, gou geiq ndaej mwngz ceiq haengj gwn ceizngaeux lo.

Daxboh, lwnh mwngz nyi, aen singhgiz neix gou camgya “angqcoux bi moq, cuengqmbin siengjmuengh” cozvwnz doxdax, ndaej youhsiuciengj bw, mwngz itdingh caeuq gou ityiengh haisim ba. Aen yozgiz neix, gou vanzlij camgya govwnz langjduz doxdax, moix ngoenz cuengqhag le, gou cungj ciuqgingq lienh doegsaw, roengzrengz dawz moix cih saw doeg ndaej cinj, dawz biujcingz lienh ndaej engq fungfouq. Goengfou mbouj vi boux miz sim, gou ndaejdaengz ngeihdaengj- ciengj lo.

Daxboh, yenzdan ngoenzhaenx, miz gyoengq daeggo dahcej Nanzningz Si Denhdauz Sizyen Yozyau he daeuj hagdangz dou caeuq gyoengqdou gyau baengzyoux. Gou gig miz fuk, roxnaj dah cej ndeu, de gangjvah gig ndei dingq, de soengq aen soujbyauj gyaeugetget ndeu hawj gou, vanzlij soengq haj bonj sawgovai hawj gou dem, dah cej neix naeuz, daengz cuengqgyaj le yaek daiq gou youz Nanzningz, caen dwg angq lai lo.

Daxboh, gou laeglemx naeuz mwngz nyi, daxmeh ndaej gya ngaenzhong lo, ndaw ranz cawx aen densi moq ndeu lo, ndaw ranz miz song aen densigih, daengz gvaqcieng mwngz dauqma, gou couh mbouj yungh caeuq mwngz doxceng yawj densi lo. Daxboh, duenh neix daeg- nuengx ndangdaej haemq coekcangq, mbouj bingh geijlai lo, fajnaj bizboedboed luenzlili, dwggyaez dangqmaz. Goengda ndangdaej lij cangq, lij ndaej bang daxmeh guh di hong. Dienheiq nit le, song cik ga daxbuz youh dot lo, mboujgvaq mwngz gaej yousim, daxmeh ngoenzngoenz cungj oenq yw hawj daxbuz cimq din. Gou gingciengz bang daxbuz raix raemx cimq din, mwngz couh cuengq- sim ba.

Daxboh, yaek geizgauj lo, seiz- neix gyoengqdou fuzsiz gig gaenjcieng, gou itdingh aeu ndeindei fuzsiz gunghgo, ceng’aeu gaujsi ndaej engq ndei cingzcik, mbouj hawj mwngz saetmuengh.

Doeklaeng, gingqhoh daxboh ndangdaej coekcangq, gunghcoz swnh- leih!

Dahlwgsau mwngz: Vangz Cwnhyi

2015 nienz 1 nyied 8 hauh

（指导老师：韦春明 黄春菊）