Ngoenzneix, gou boux dog gag youq ranz, roxnyinh gig mbwq, couh siengj boq bop daeuj guhcaemz.

Gangj guh couh guh, gou dawz aen bingz ndeu daeuj, cuengq raemxgenj roengz bingz bae, caiq aeu diuz gyongjiq ndeu daeuj. Gou sien aeu gyongjiq caemj roengz bingz raemxgenj bae, dawz hwnj caiq menhmenh boq, couh boq ok aenbop hunghung iqiq, mwngz yawj, lij miz aenbop “songseng” dem bw! Gou angq dwk diuq hwnjdaeuj. Haujlai aenbop comz youq henz ndang gou, gij aenbop neix youq laj ndit ciuq bienq baenz hoengzhoengz heuheu, gyoengqde humx youq henz ndang gou lumj dahsien sanq va nei mbin hwnj mbin roengz、mbin swix mbin gvaz. Gou youq ndaw seiqgyaiq aenbop, roxnyinh swhgeij couh lumjbaenz aen bop gyaeundei ndeu, yaep ndeu mbin youq gwnz fwjhau, yaep ndeu youq ndaw ndoengfaex guhcaemz. Gou mbin gvaq dah gvangq、mbin gvaq bya sang, mbin daengz Baekging, caeuq lwgnyez Baek- ging guh baengzyoux……

Gij bop gou gag guh gag boq okdaeuj neix, hawj gou angqyangz dohgvaq ngoenz ndeu.

（指导老师: 覃玉往）