Aenvih mbwn naeuh, Veiz Gozcingh bae ceiz ngoenz ndeu.

Baez hoih neix mbouj doengz gij hoih doenghbaez. Daihgya sien aeu bae Baekging Daihhag ngonz bauq- daihcih gonq, camgya henzdingq Baekging Daihhag gvendaengz baij cujguhhong dwg hengzguh gij lohsienq fanjdoengh swhcanjgaihgiz roxnaeuz dwg hengzguh gij lohsienq gwzming Mauz cujsiz cungj lwnhleix neix. Veiz Gozcingh itcig simcingz naekreg. De doiq guh “vwnzva dagwzming” mbangj guhfap, mbouj lijgaij, yawj mbouj gvenq. De soqlaiz sim sijsaeq raixcaix, baezneix yawj raen genjbauq gwnzde daeng miz gij vah Gyangh Cingh le, cix naeuz:“De caemh daeuj camcingq, de rox di gijmaz!” Dingq Ciz Bwnjyij youq cujsaeq gwnzde gangjvah le, de naeuz:“Hawj de bae guh boux yenveij suhgi, lau haeux cungj mbouj miz gwn.”

Youq baez hoihhung gwnzde, Veiz Gozcingh youz boux cunghyangh veijyenz cajbouj ndeu swngbouj guh boux cunghyangh veijyenz ndeu.

Baez hoih neix hai sat le, Guengjsae caeuq daengx guek dox- doengz cungj nauh mbouj dingz. Hungzveibingh doengh mbouj doengh couh aeu Veiz Gozcingh okdaeuj ciepraen, mbouj ciepraen nei cix rag doih bae naenghcaem haepvi, ciepraen nei youh deng humx nauh. Ngamq haidaeuz dwg coemh、hat maenj Swcigih Dangjveij, gvaqlaeng dwg dub vaih Swcigih Dangjveij, ngoenz haenq gvaq ngoenz.

Ndwen 8 ngoenz 16, Veiz Gozcingh deng nyaemhmingh guh boux suhgi daihngeih Cunghgung Cunghyangh Cunghnanzgiz, mienxbae boux suhgi daeuzit Guengjsae Bouxcuengh Swcigih Dangjveij aen cizvu neix, youz Gyauz Yaujgvangh daeuj swnj. Bonjlaiz, de gojyij bekbek caekhaex deuz bae cunghnanzgiz, hoeng de naemj, geij bi neix daeuj cujyau dwg de gaem gij hong Guengjsae, mbouj ndaej seizbienh cuengqfwngz mbouj guenj, wnggai gaem daengzdaej bae, ndigah, de cix louz roengzdaeuj lo.

Ndwen 10, aen hoih hong cunghyangh youq Baekging hai, Veiz Gozcingh caeuq Gyauz Yaujgvangh cungj bae camgya. Cinz Bwzdaz youq gwnz hoih gangjvah, naeuz miz mbangj ganbu you caeuq daezfuengz yinh- doengh dwg lau ginzcung、 lau gwzming, gangj haenq di lij dwg daenz vunzlai caeuq fanj gwzming. Linz Byauh goenghai boq “yinhdoengh vunzlai dienyienz hableix” dingz lwnhdiuh neix. Gyauz Yaujgvangh naeuz:“Yienghneix gauj yinhdoengh, gauj daengz gizlawz, gizde cix baenz bouxgyad, guh hong、swnghcanj cungj hoj guh lo, yinhdoengh vunzlai dienyienz hableix dij ndaej raeuz bae ngeixnaemj.” Veiz Gozcingh caemh gig miz doengzgamj, de ceiq you dwg gij seizndei ngamqngamq okyienh haenx deng gij yinhdoengh neix buqvaih liux bae.

.(caengz sat)