2014 nienz 8 nyiet 17 hauh, dwg ngoenz daegbied ndeu. Gou caeuq ndaw yienh song boux lauxsae ndawsim oet gij maqmuengh lwgminz Vanzgyangh, gwnz mbaq rap gij rapnaek cienzswnj vwnzva Boux- cuengh, maq daehhingzlij, naengh ci bae daengz Gvangjsih Sawcuengh Yozyau hagsib Sawcuengh.

Vanzgyangh dwg aen Mauznanz Cuz Swsiyen, hoeng, Bouxcuengh vunz ciemq gig lai, gangj Vahcuengh guhcawj, hoeng, rox sij Sawcuengh mboujmiz geijlai vunz, ndigah, doigvangq Sawcuengh dwg aen cwzyin boux lauxsae Sawcuengh hagdangz mbouj ndaej doi ndeu.

Youq Gvangjsih Sawcuengh Yoz- yau hagsib swnghhoz cib lai ngoenz, gou rox ndaej gig lai doxgaiq, gij cingzgingj vaiqvued caeuq raeujrub haenx, yaek hawj gou ciuhvunz cungj lumz mbouj ndaej. Youq gizneix hagsib, gou lumj youh dauqma daengz hagseng seizdaih.

Moix ngoenz bae ndaw ranzhaeux gwn ngaiz, gou caeuq gyoengq doengzhag ityiengh, ndwn youq ndaw doih raezranghrangh, caj gwn ngaiz, gwn gij ngaiz rangfwdfwd haenx feihdauh dangqmaz, lumj dauqma daengz cib bet gouj bi, caemndang youq doih vunz neix, gou caeux couh lumz liux swhgeij gaenq dwg baenz meh gvaq, sim hix bienq coz, ndigah, gou vaiqveud dangqmaz!

Moix ngoenz byaij youq gwnz loh ndaw hagdangz, muenghraen doengh- go maknganx, baenz byoengh baenz- roix maknganx diuq roengzdaeuj, yaengx fwngz couh lumh daengz, gij heiq mak rangfwdfwd coemj haeuj ndaeng daeuj, hawj vunz myaiz lae okdaeuj. Raq rumz ci gvaq, gij maknganx cug haenx couh doek- bikbuk roengzdaeuj, veilauz dou gyoengq hekgyae neix, dou cimz daengz maknganx singjsien diemz- subsub neix, gwn youq ndaw bak, van daengz ndawsim, ndigah, gou gig vaiqveud！

Moix ngoenz naengh youq ndaw gyausiz ronghsagsag hwnjdangz, dou caemrwgrwg dingq lauxsae gangj goq. Son dou hag Sawcuengh dwg Liuz lauxsae, Liuz lauxsae dwg vunz Denhdwngj Yen, Cunghyangh Minzcuz Dayoz bizyez, de gangj Vahcuengh ndaej raeuzradrad, gangj goq youhmwz youh sengdoengh, engqgya naihsim saeqnaeh. Vihliux hawj moix boux yozyenz hag ndei Sawcuengh, de daj singmeh “b、 mb、 m、f 、v……” caeuq yinhmeh “og、 oeg、 ueg、 ug、wg……”son hwnj, daj aen cihsaw daengz gawqvah, cungj swhgeij guh sifan fatyaem son dou, bouxboux son rox, caen dawz gyoengq “lwgnyez geq” dou dangqguh hagseng iq. Caenhguenj singlet lo, myaiz haw lo, Liuz lauxsae lij gangj ndaej feihdauh raixcaix, gangj ndaej dou rox liux cij dingz. Haidaeuz, ngamq hwnjdangz song ngoenz, miz haujlai yozyenz couh mbwq hag lo, couh mbouj siengj yunghsim bae hag lo. Doeklaeng, dingq Liuz lauxsae hwnjdangz le, daihgya cungj deng gij cingsaenz gaenx sonhag youh miz cwzyin de gamjdoengh lo, gyoengqde gaijbienq siengjfap gaxgonq, roengzrengz bae hag Sawcuengh, roxnyinh daeuj gizneix beizyin, gij yinvu swhgeij dwg hagndei Sawcuengh, gvaqlaeng dauq- ma hagdangz lijaeu son lwgnyez. Yienghneix, mboujguenj youq ndaw gyausiz, roxnaeuz youq ndaw diegninz, seizseiz cienz daeuj sing lienhdoeg Sawcuengh gyoengq yozyenz. Doeg ndaej bienq diuh lo, hawj vunz goemq dungx riu, hoengq daihgya lij genhciz lienh doeg. Roxnaeuz dou hix gaenq cungnienz, rox daengz seizgan dinj, caen haeuj coenz vah neix: Vaizlaux mingz rox daengngoenz dinj, mbouj yungh yaengx faex couh gag buet.

Youq ndaw gyausiz yinhyoz, dou riengz yinhyoz lauxsae hag ciengq go Sawcuengh, hag diuqfoux Boux- cuengh, caenhguenj dou hwet gaenq bizbwd, naengdungx gaenq soengsag, hoeng, riengz gij yinhyoz ndeidingq haenx, dou diuqliklik, cungj lumz liux nienzgeij swhgeij, diuq ha, ciengq ha…… Dou cienzbouh caemndang youq ndaw vaiqvued neix, caenhcingz yiengjsouh gij vaiqvued neix.

Gvangjsih Sawcuengh Hagdangz ha, mwngz dwg aen hagdangz miz minzcuz daegsaek ndeu, youq gizmwngz, dou rox daengz minzcuz vwnzva、 minzcuz fungcingz Boux- cuengh raeuz; youq gizmwngz, dou roxdaengz gij eiqsei naekhung hag Sawcuengh…… Gou youq gizmwngz hag ndaej haujlai haujlai, ndigah, gou rox daengz youq gizmwngz hagsib vaiqvued dangqmaz!