Boux vunz gou ceiq gyaez haenx dwg daxbuz gou. De miz doiq da luenzlulu ndeu, ndaeng sang bak gvangq. Daxbuz gou dwg boux vunz gaenx guh haengj bang bouxwnq ndeu.

Miz ngoenz ndeu, daxbuz hwnj bya bae ndaem faex, de raen duz roeg sieng ndeu, couh dawz duz roeg sieng haenx daiq ma ranz, bang de dwk yw, gueng de gwn doxgaiq, gvaq mbouj nanz, duz roeg sieng menhmenh ndei lo, roeg heuh caca lumj dwg gangj: “Docih, docih daxbuz.”

Miz baez ndeu, miz boux lwgnyez ndeu youzlangh daengz mbanj dou, daenj buhvaq vaihvadvad, byaij loh cungj mbouj miz rengz, ndang saenzdwddwd, gig hojlienz. Daxbuz raen le, ganjvaiq daiq boux lwgnyez ma ranz, vuenh dauq buhvaq ndei ndeu, hawj de gwn ngaiz, lij louz de gvaq haemh. Ngoenz daihngeih, bouxlaux boux lwgnyez neix daeuj ra, ra daengz ranz gou, raen lwgnyez de ndaej ciuqgoq baenzneix ndei, gamjdoengh dwk song hoq gvih roengz doiq daxbuz naeuz: “Mwngz caen dwg boux vunz simndei ndeu! Vunz ndei miz ndei bauq!” Lij naeuz soengq di ngaenz hawj daxbuz, hoeng daxbuz baenzlawz cungj mbouj aeu.

Youq ndawsim gou, daxbuz dwg boux vunz simsoh gaenx guhhong youh maij bang boux- wnq ndeu. Gou gyaez daxbuz gou!

（指导教师：冼娟凤）