Singhgiz roek, gou、daeggo caeuq daxboh itheij bae youzraemx.

Bae daengz giz dieg youzraemx, gou yawjraen gij raemx ndaw mboq sawndikndik, ndaw raemx gij bya iq youz bae youz dauq, seizhaenx miz haujlai vunz gaenq youq ndaw raemx youzraemx. Gou daenj ndei buh- youzraemx caeuq buhgouqseng, daxboh lwnh gou naeuz, aeu di raemx saj hwnj gwnz ndang bae, roengz raemx couh mbouj lau nit lo, gou couh ciuq daxboh gangj haenx guh. “Ndaw raemx cwxcaih lai lo, vaiq roengzdaeuj ba.” Daxboh hemq gou. Gou “bung” sing ndeu couh diuq roengz raemx bae. Caenhguenj gou miz cunjbei, hoeng gou vanzlij gamjdaengz gij raemx nityauyau. Gou miz di lau, cij youq henzbien youz, mbouj gamj youz ok rog bae. Gou raen daeggo caeuq daxboh youq baihrog youz ndaej gig angq, gou nyaenx mbouj ndaej hix yiengq gyoengqde youz bae, hoeng gou baenzlawz hix vad mbouj bae, daxboh couh gvaqdaeuj son gou, heuh gou yungh song gaiq fwngz yiengq baihrog vad raemx, din aeu yiengq baihlaeng dik, gou ciuq yiengh daxboh gangj bae guh, gou youz ndaej bae di ndeu lo, hoeng lij mbouj gamj yiengq gizgyae youz, daxboh mboujduenh gujli gou, gou gig nyinhcaen bae hag. Seizneix gou gamjdaengz miz di dwgrengz lo, sawqmwh, mbouj siujsim, caem roengz raemx bae, raemx haeuj ndaeng bae lo, aenndaeng sikhaek manhsaengsaeng, hoeng gou lij genhciz youz. Ciemhciemh dwk, gou hag rox youzraemx lo.

Gou hag rox youzraemx lo, gou sim’angq raixcaix. (指导老师：李丽君)