Baez yamq haeuj dou hung yozyau dou, couh yawjraen go rungz hungsang mwncup ndeu.

Go rungz neix youq ndaw yozyau dou gaenq miz 60 lai bi lo, gorungz maj ndaej gig mwn, mbawfaex daengx bi seiq geiq cungj dwg heusausau, gij nge mbaw gorungz lumj aenliengj cengq hai nei, ndei yawj dangqmaz. Gwnz gorungz miz haujlai rongzroeg, gak cungj roeg cungj gyaez youq gizneix guh rongz, gyanghaet mbwn ngamq rongh, gwnz gorungz couh nauhyied hwnjdaeuj lo, miz mbangj roeg mbin bae mbin dauq, miz mbangj roeg cici caca cieng go, go faexrungz couh lumj aen diendangz duzroeg nei.

Gorungz mbouj dan dwg diendangz duzroeg, laj gorungz lij dwg giz dieg ndei hawj gyoengq doengzhag guh’angq.

Seizcin doek fwnmoenq, gorungz couh lumj aenliengj nei bang dou dangj fwn, dou youq laj gorungz guh’angq, di ndeu hix mbouj deng fwn rwed. Seihah, ndit ndat lumj feiz, gorungz youh lumj aenliengj nei vih gyoengqdou dangj ndit, gyoengq doengzhag cungj gyaez youq laj gorungz aeuliengz、yawj saw、dwk geiz、diuq cag……

Go faexrungz neix hawj dou daiq daeuj haujlai fueng- bienh, hawj dou daiq daeuj haulai angqyangz, gou gyaez go faexrungz neix, gou engq gyaez yozyau gou.

（指导老师：韦凤玲）