Gou miz boux baengzyoux ndei ndeu, de bineix cibngeih bi, maj ndaej mbouj suenq sang, hix mbouj maenghcangq, aennaj de luenz lili, cibfaen dwggyaez. De couhdwg banhcangj dou—Siujswng.

Siujswng maij bang vunz, cijaeu de guh ndaej daengz, mboujlwnh dwg bouxlawz, hix mboujlwnh dwg seiz- lawz, de cungj caenhsim caenh’eiq bae bang. Geiq ndaej miz baez ndeu, Siujhangz cingq vih cingzcik de yousim, miz giz mbouj mingzbeg youh mbouj rox baenzlawz guh. Cingq youq seizhaenx, Siujswng byaij gvaqbae doiq de naeuz:“Gou daeuj bang mwngz ba!” Siujhangz dingq le, couh lumj youq ndaw laepngau miz daeng soengq daeuj nei naeuz: “Ndei lai lo!” Siujswng vix diuz daez ndeu naeuz: “Mwngz yawj diuz daez neix dwg gouz menciz aenyenz, aen goengsik gouz menciz aenyenz dwg……” Miz mboengq ndeu, baez roengzdangz, Siujswng couh son Siujhangz gej daez, gvaq ndwen lai, gij cingzcik Siujhangz daezsang haujlai, Siujhangz angq dwk doiq Siujswng naeuz: “Mwngz maenh’ak lai lo! Docih mwngz!”

Gij singqcingz Siujswng miz seiz miz di gujgvaiq, hozndat seiz lumj duzguk fatbag nei, mwngz cienfanh gaej nyex de, hoeng de sim’angq seiz, mwngz couh cinj beng diuz “heujguk” de, de hix riuhehe. Miz baez ndeu, hwnj goq hozdung, dou gangj ndei aeu bae dwk binghbanghgiuz, hoeng dingq gangj aeu baizlienh cezmuz, aennaj de sikhaek raez lumj najmax, doeklaeng lauxsae miz saeh wnq mbouj baizlienh lo, de youh sikhaek angq dwk diuq hwnjdaeuj, de bienq ndaej baenzneix vaiq, hawj gou geizgvaiq ndaej gangj mbouj ok vah daeuj.

Caenhguenj beizheiq Siujswng miz seiz miz di gujgvaiq, hoeng dou cix baenz baengzyoux ndei.

（指导老师:方雪珍）