24、Ndwenngoenz Haemz- hoj

Bi 1966 ngoenzbimoq haemh- gonq, Veiz Gozcingh ma daengz Namzningz, caeuq geij boux suhgi dangjveij ndaw gih doxyaeng le, youh gyoebcomz le 20 lai boux vunz guh baenz aen cujsaeq hagsib ndeu, bae Sanghaij saeddieg gaujcaz ndwen ndeu. Mizgven bumwnz caemh ciuq gij yigen de, ngeixyaeng gyagiengz caeuq Sanghaij gapguh.

Cingqdang Veiz Gozcingh caeuq gij goengdaeuz swcigih wnq siengj youq “aen daih 3 aen 5 bi giva” duenhneix hoenghwhdhwd guh ciengz ndeu seiz, “vwnzva dagwzming” gienh saeh laux ciuhgeq mbouj miz gvaq neix hainduj lo. Gij muenghsiengj ndei Veiz Gozcingh siengj ceng ndaej Sanghaij cienzmienh bangcoengh Guengjsae haenx, deng raq fwnhaenq cwngci neix dajluenh lo. Guengjsae roengzrengz le haujlai bi cij ceng ndaej gij seizndei neix, youq “cauhfanj mizleix” aen nienzdaih neix youh deng buqvaih lo.

Bi 1966 ndwen 7 ndawnyieb, cunghyangh baij aen feihgih Yih’wj 14 daengz Namzningz, ciep Veiz Gozcingh bae Baekging camgya aen hoih Cunghgung Daih Bet Gaiq Cibit Cungh cenzvei. Mwh feihgih youq Vujhan yietnaiq, mbwn hwngq lai, bouxhai feihgih cingjsi:“Ciuq heiq- siengq bauqnaeuz, baihnaj byajraez doek fwnraq, baihdoeng daengz Namz- ningz, baihsae daengz Cungzgingh, cungj miz fwjlaep, mbouj miz banhfap gaijloh mbin lo, baenzlawz banh?” Veiz Gozcingh cam:“Lij miz gijmaz banhfap ndaej mbin gvaqbae lwi?” Bouxhai feihgih naeuz:“Gojyij sawq- yungh mbindaemq dingz banhfap neix.” Veiz Gozcingh naemj hai hoih ngoenzcog cix yaek aeu bauqdaengz lo, doengzeiq sawqyungh mbindaemq dingz banhfap neix.

Byawz liuh daengz ngamq mbin gvaq Vujhan, baihnaj youh deng fwjlaep laengz lo, baihlaeng fwn doek naemq raixcaix, feihgih ngauzngwd- ngwd, cijndei deng roengz youq aen ciengzfeihgih bingyungh baihhenz lo. Feihgih ngamq gyangq roengzdaeuj, seiqhenz ciengzfeihgih cix fwj laep- ngaungau, byajraez fwn haenq, sing byajraez gungzlungz gok dwk rwz yaek nuk bae, daihgya cungj doeksaetmemx ne.(caengz sat)