(ciep geizgonq)

Miz ngoenz ndeu, gvan gou cuengqgyaj ma ranz, lwg’iq nanz mbouj raen daxboh sim’angq lai lo, seiz mbouj seiz riugatgat. Gvan gou daeuq de: “Dah’iq ha, mwngz gyaez mbouj gyaez daxboh ha?” Lwg’iq han naeuz: “Gyaez ha.” Gangj sat le couh cup najbyak gvan gou. “Mwngz gyaez daxmeh lwi?” Gvan gou youh cam de. “Gyaez ha.” Lwg’iq han le buet daeuj umj gou, youh cup naj gou. Gvan gou geizheih lai, cam gou lwg’iq lij iqet, baenzlawz rox gaiqneix. Gou naeuz dwg riengz ndaw densi hag ndaej, miz diuz go ndeu ciengq naeuz “gyaez gou mwngz cix cupcup gou, gyaez gou mwngz cix umjumj gou……” Gvan gou cix haenh naeuz lwg’iq gvai lai bw. Gvan gou youh daeuq lwg’iq: “Daxmeh gyaez daxboh lwi?” Lwg’iq ngaekngaek gyaeuj. “Daxboh ndaej gyaez daxmeh lwi?” Lwg’iq baetbaet gyaeuj youh caiq ngaekngaek gyaeuj. Gvan gou cix gvaqdaeuj sawq umj gou mbat ndeu, lwg’iq yawj daengz neix, doq daejnga’nga hwnjdaeuj. Doq daej doq naeuz:“Neix dwg daxmeh gou, mij dwg daxmeh mwngz, w w w……” Gou caeuq gvan roxnyinh ndeiriu raixcaix. Gou umj lwg’iq haeuj rungj, lwg’iq lij uet raemxda naeuz: “Gou mbouj aeu daxboh neix, daxboh neix mbouj ndei saek di……” Gvaq yaep ndeu, youh raen de buet bae caemh gvan gou guhcaemz lo, seiz mbouj seiz cix dingqnyi sing riugekgek cienz daeuj, dangq bouxlaux naeuz caen dwg lwgnyezsaeh ha.

Ngoenz daihngeih, gvan gou yaek dauqbae diegrog hwnjban, gou umj lwg’iq naengh gunghgyauhceh bae soengq gvan, yaek daengz cehcan seiz, gvan gou naeuz roengz ci lo. Lwg’iq doq daej hwnjdaeuj, naeuz aeu daxboh, mbouj hawj daxboh roengzci, yienghneix gvan gou caiq lai naengh gvaq song aen camh, cix yaeuh lwg’iq naeuz bae cawx mak hawj de gwn, lwg’iq yaepyaep lwgda han naeuz: “W, gou ceiq gyaez gwn mak lo.” Gvan gou roengz ci seiz coh lwg’iq vadvad fwngz. Lwg’iq daengq naeuz: “Daxboh aeu vaiq di dauqma bw.” Gou nyaenx mbouj ndaej riu lo. Gvaq le geij ngoenz gvan gou caiq dwk dienhvah daeuj, lwg’iq cam: “Daxboh mwngz cawx mak caengz dauqma ha? Gou siengj gwn mak lo.” Lwgnyez caen mbouj roxnaj ndwenngoenz ha, guhcaemz guh’angq gvaq ngoenz, youq ndaw ukgyaeuj de, ngoenzngoenz miz gwn miz daenj caeuq miz vunz buenx cix mbouj you mbouj heiq lo.

Banhaemh ninz youq gwnz- mbonq, lwg’iq ndonj haeuj rungj gou daeuj. Mbwn hwnz lo, gou gyaep lwg’iq vaiq di ninz. “Daxmeh, mwngz gangjgoj hawj gou nyi, gou cix ninz ndaej ndaek.” Lwg’iq nauh naeuz. Yienghneix, gou cix song fwngz menhmenh bongx baihlaeng lwg’iq, menhmenh damz lox de ninz:

“It ndaundeiq,

Ngeih ndaundaen,

Aenaen cungj raizcongh,

Aen ndeu rongh gyangmbwn,

Maxlaeuz gaxgonq youq baihloh,

Gwn daep mbouj faen boh,

Gwn noh mbouj faen au,

Au bae ciengx maxbang,

Maxbang bae cimh doih,

Raen iqmoiz ciengx vaiz,

Raen iqfaiz ep goep……”

Gwq damz gwq damz, gou caeuq lwg’iq seizlawz ninzndaek hix mij rox, mbwn laepsaengsaeng, hwnz caem- rwgrwg, mbonq raeujrubrub, hoeng ndaw ukgyaeuj gou haujlai ngaeuzveh foekfan fwgfwg. Gou guhloq lo, ya, lumjnaeuz gou ma daengz seiziq de lo, youq laj goek gofaex caeuq nyezdoih guh yahndoj, lij benz youq gwnz ngafaex bibi buengqbuengq, doq bi doq damz:

“Neuz ninet,

Bet gang laeuj,

Gouj gang dangz,

Rieng maningq,

Ningq ma gvaiz,

Gvaiz roegciu……”

(sat)