It、Haeujsim Baujraeuj. Mbwn liengz le, haethaemh dohraeuj doxca lai, boux baenz menhsingq dungx in daegbied aeu haeujsim baujraeuj aendungx, habseiz dem daenj buhvaq, gyanghwnz ninz aeu hoemq denz ndei, fuengz aendungx dwgliengz yinxfat baenz dungx in roxnaeuz bingh gaeuq gya’naek.

Ngeih、Gwnndoet Diuz- ciengx. Boux baenz dungx in gijgwn aeu raeuj、unq、cit、gwn cai、singjsien guhcawj, guh daengz dinghseiz dinghliengh, gwn noix gwn lai donq, hawj gijgwn ndaw dungx ciengzseiz miz doxgaiq caeuq veisonh doxcung, yienghneix ndaej fuengz nemmuek aendungx deng gaet caeuq giz biux naeuh engq haeujnaek.

Lai Gwn Cuk Ndat. Haeux- cuk cujyau dwg aeu haeuxsuen、haeuxfiengj roxnaeuz haeuxcid、haeuxlidlu daeuj cawj baenz, yingzyangj cwngzfwn lai, caemh- caiq haeuxsuen、haeuxfiengj、haeuxlidlu singq diemz ndaej huz heiq dungx、bouj mamx haw, ndigah, seizdoeng ciengz gwn cuk haeuxnaz daih miz ndei- cawq.

Cauj Byaek Dwk Hozceu. Cauj byaek cawj dang cawj cuk seiz, dwk di hozceu、hingsauj、naeng makgam ndeu, geij cungj doxgaiq neix singq bingz manh raeuj, ndaej giep caep bauj heiq dungx. Aen fap neix mboujdanh seizdoeng hab yungh, boux heiq- yiengz aendungx haw bi daengz byai cungj hab gwn.

Bak Hamz Hingndip. Cungh- yih nyinhnaeuz, hingndip dwg yw ndei dingz rueg. Mwh mwngz dungx fan siengj rueg, ndaej cab aeu gep hingndip ndeu hamz youq ndaw bak, couh nanz rueg ndaej okdaeuj.

Sam、Geihbak Baujyangj. Boux baenz dungx in aeu haeujsim geihbak, mbouj gwn gij doxgaiq gyoet lai、ndat lai、geng lai、manh lai、niu lai, engq aeu geih lanh gwn lanh ndoet, gaiq ien gimq laeuj. Linghvaih, gwn yw seiz ceiq ndei dwg gwn haeux gvaqlaeng caiq gwn, fuengz nemmuek aendungx deng gig cauhbaenz bingh engq haeujnaek.

Seiq、Simcingz Vaiqvued Diuzciengx. Dungx in naekmbaeu caeuq bouxvunz simcingz gvan- haeh maedsaed. Ndigah aeu gangj simleix veiswngh, baujciz simcingz vaiqvued onjdingh, gaej gaenj- cieng、youcaeuz、fatheiq. Doengz- seiz aeu guh daengz guhhong yietnaiq doxgiethab, fuengz naet- naiq gvaqbouh yingjyangj dungx in hobndei.

Haj、Yindung Cangq Ndang. Boux dungxsaej miz bingh aeu guh habdangq lienh- ndang yindung, hawj aenndang lai dingj ndaej bingh, baujciz ndang- daej gengangh.