Conhgyah byaujsi naeuz, mwh cat heuj raen nohheuj ok lwed, ndaej genjcaz gaiqcatheuj dwg mbouj dwg bwn geng lai. Danghnaeuz dwg aenvih bwn gaiqcatheuj geng lai cauhbaenz ok lwed, ndaej lingh vuenh gaiqcatheuj bwn unq ndeu daeuj laebdaeb cat. Bingzseiz wng guh ndei conghbak veiswngh, aeu guh daengz baihlaj seiq diemj:

1、Moix donq gwn haeux sat caeuq gwn caeuz sat aeu riengx bak, boux baenz nohheuj in ndaej aeu raemx riengx bak, yienghneix ndaej gaj dai dingzlai nengzbingh ndaw bak caeuq seiqhenz diuzheuj, hawj ndaw bak mbouj miz heiqhaeu.

2、Genhciz haethaemh cat heuj. Boux baenz nohheuj in ndaej senj yungh yozvuz yazgauh daeuj cat heuj, ceiq ndei dwg senj cawx geij cungj binjbaiz mbouj doxdoengz caemhcaiq miz dingz lwed yaugoj daeuj doxlwnz cat heuj.

3、Ngoenznaengz wng aeu sienqheuj (ceiq ndei dwg moix donq gwn haeux sat caeuq gyanghaemh yaek haeujninz gaxgonq) daeuj beng cat, geh heuj hung lai ndaej aeu gaiqcat geh heuj daeuj cat, siucawz gij nyaqhaeux nyaqbyaek heizheuj lamqlw youq goek heuj bae seuq, fuengz heuj baenz gietsig.

4、Dinghgeiz bae yihjyen swiq heuj. Itbuen byongh bi daengz bi ndeu bae swiq heuj baez ndeu. Boux heujnengz heujswt heujbingh aeu bae yihyen guh hidungj ceihyw cij ndaej.

Linghvaih, boux baenz daep ndongj、boux aenmamx gihnwngz ok luenh、boux mak in geizlaeng daengj nohheuj hix rox ok lwed. Danghnaeuz dwg yienghneix, wng gibseiz bae yihyen duenq yw.