Gou ceiq gyaez daxboh gou, aenvih daxboh gou ceiq gvansim gou.

Geiq ndaej miz bi ndeu seizdoeng, lwgfwngz gou mbouj siujsim deng mid heh lo, lae haujlai lwed. Daxboh yawjraen le, sikhaek dawz ywdingzlwed daeuj samj hwnj giz sieng bae, youh aeu baengzsa daeuj bau ndei, lwed cij dingz. Gou yawj daxboh guh gijneix, ndawsim siengj: Daxboh caen lumj boux canghyw.

Daxboh mboujdanh dwg boux canghyw gou, lij dwg boux vunz bang gou gouqgip ndeu.

Miz baez ndeu, gou hwnqcongz ceiz lo, bae hagdangz yaek cizdau lo, gou gipmuengz buet bae hagdangz. Sawqmwh baihlaeng cienz daeuj sing mozdozceh. Gou ngeux gyaeuj yawj, dwg daxboh, gou sim naemj :“Mbouj deng ha! Gunghcangj daxboh mbouj caeuq gou doengz fuengyiengq ya!” Gou dingz roengzdaeuj, cingq siengj cam daxboh, daxboh cix sien gangj lo, naeuz: “Daeglwg, mwngz siengjsiengj, mwngz lumz daiq gijmaz lo?” Gou sikhaek hai daehsaw yawj. O! Lumz daiq swdenj caeuq bouhlienhguh lo! Gvaiq mbouj ndaej daehsaw baenzneix mbaeu. Gou gaem ndei swdenj caeuq bouhlienhguh, daxboh couh doz gou bae hagdangz, ngamq daengz hagdangz, lingz hwnjdangz couh yiengj lo, caen yiemj!

Daxboh mboujdanh dwg boux gouqsip gou, lij dwg “beixnuengx” ndei gou.

Baez daengz singhgiz roek gyanghaemh, gou caeuq daxboh itdingh naengh youq gwnz congz guh dajcih youzhi. Miz baez ndeu, dou daj le geij ciengz, lij faen mbouj ok sawhingz, daxboh couh saj ok “bakhung fouzdig” daeuj daeuq gou riu, gou baez riu, faensim lo, mbouj siujsim couh saw lo, gou gangj mbouj suenqsoq, doeklaeng nauh baenz diemj cung bae. Daxmeh byaij haeujdaeuj ndaq dou: “Caen dwg song ‘beixnuengx’ cabheiq. ”

Gou ceiq gyaez daxboh gou, aenvih de mboujdanh dwg daxboh, lij dwg “beixnuengx” ndei gou.

(指导教师：韦凤妹)