Ngoenz singhgiz, daxboh caeuq daxmeh bae rog guhhong mbouj ma ranz gwn ngaiz, caenh miz gou caeuq dahnuengx youq ranz. Daxmeh okbae seiz daengq gou naeuz: “Dahnuengx lij iq, caengz rox cawj ngaiz, cawj ngaiz couh gvi mwngz lo.”

Banngaiz cib’it diemj, gou caeuq dah- nuengx dungx cungj iek lo, gou couh bae cawj ngaiz. Gou yawjraen ndaw gu miz ngaiz lw, couh daek okdaeuj, dawz gu swiq seuq, rau haeuxsan, gou siengj, cijmiz gou caeuq dahnuengx song boux vunz, wnggai rau buenq gaen haeuxsan couh gaeuq lo. Gou rau ndei haeux, cuengq raemx roengzbae swiq seuq, gya raemx seiz, gou hawj raemx mued gvaq haeuxsan it lizmij sang, sim ngeix, wnggai hab lo. Yienzhaeuh gou dawz damjgu uet hawq cuengq roengz gu bae, goeb ndei fa, cap dienh, naenx aen haigvan. Gvaq ciblai faen cung le, haigvan diuq hwnjdaeuj lo, gu ngaiz rang- fwdfwd he couh cawj cug lo.

Gou caeuq dahnuengx couh daek ngaiz daeuj gwn. Aenvih gou lij caengz rox cawj byaek, ndigah dou cij gwn ngaiz hoengq. Caenhguenj mbouj miz byaek, hoeng gwn gij ngaiz rangfwdfwd swhgeij cawj haenx, gamjdaengz gig feih. Gou gietsim ngoenzcog couh hag cawj byaek, gou roxdaengz, swhgeij doengh fwngz, miz gwn miz daenj.

（指导教师：吴志平）