Ngoenzneix, mbwn raeujrubrub, youq ndaw ndoengfaex heuswdswd haenx, doenghduz cungj ciuq gij fuengsik daegbied swhgeij daeuj angqcoux moix ngoenz daeujdaengz, saedceij gvaq ndaej geijlai vuenyungz ha!

Daxboh gig gyaez bae dwk roeg. Ngoenzneix, daxboh sim gig angq, beq hongdawz dwk roeg yaek bae dwk roeg. Gou raen le, couh ganjvaiq doiq daxboh naeuz:“Daxboh, mwngz gaej bae dwk roeg lo, mwngz rox lwi? Duzroeg dwg baengzyoux ndei vunzraeuz, de bang doenghgo gaeb nonhaih, miz duzroeg bang raeuz soucingz cij ndei bw. Duzroeg lij hawj raeuz ciengqgo, vih raeuz daiqdaeuj angqyangz. Caiq gangj roeg iq hix miz sengmingh, raeuz gaeb de le, bohmeh de geijlai siengsim ha! Raeu aeu baujhoh de, insik de, mbouj ndaej sienghaih de.”

Daxboh dingq gou gangj le, ngaekngaek gyaeuj, mbouj ndei eiqseiq dwk gangj:“Ndei, daj neix hwnj gou mbouj caiq bae gaeb roeg lo, mbouj dwg mwngz gangj gij vah neix, seizneix, gou couh gaeb ndaej geij duz roeg lo. Vah mwngz gangj ndaej gig miz dauhleix, raeuz wngdang baujhoh baengzyoux ndei raeuz.”

Baujhoh baengzyoux vunz- raeuz——duzroeg, bouxboux aeu guhdaengz.

（指导教师：覃海洋）