Daxbuz gou bineix gaenq ndaej caetcib lai bi lo. Daxbuz gou byoemgyaeuj haumong, lwgda gig miz saenz, naj de ciengzseiz riunyumj, hawj vunz gamjdaengz de gig hozswnh hozunq.

Geiq ndaej gou doeg sam nienzgaep seiz, miz ngoenz ndeu banhaemh cuengqhag, gwnz mbwn sawqmwh doek fwnraq. Gou mbouj daiq miz liengj, cij ndei youq bakdou yozyau caj fwn dingz le caiq baema. Cib faen cung gvaqbae lo, ngeihcib faen cung gvaqbae lo, fwn yied doek yied hung, mbwn ciemhciemh fuemx lo, aendungx gou iek dwk yiengj “gugu”. Cingq youq seizneix, gou yawjraen ndaw fwn miz boux vunz he saemxsaemx saxsax byaij coh gou, gou uetuet aenda, sijsaeq yawjyawj, a! Dwg daxbuz gou! Gou sim’angq dwk hemq hwnjdaeuj “Daxbuz……” Gou siengj daengz daxbuz gou bingzciengz ga in, seizneix de vihliux soengq liengj hawj gou goq mbouj ndaej ga in, gou ganjgip buet gvaqbae umj dawz daxbuz, daxbuz yungh gij fwngz raeujrub de got dawz gou naeuz: “Lan ha, raeuz baema ba!” Gou ngaekngaek gyaeuj, gaem fwngz daxbuz byaij ma ranz.Youq gwnz loh, gou gaem gaiqfwngz raeujrub daxbuz, gamjdaengz daengx ndang cungj raeuj lo!

Gij gyaez daxbuz mbouj dan vih gou gang aen liengj ndeu, engq vih gou gang aen mbwn ndeu. Gienh saeh neix gaenq gvaqbae geij bi lo, hoeng lij ciengzciengz gamjdoengh gou, de son gou rox bae gamjgik caeuq hoiqbauq.

（指导老师：翚统规）