Siuj gwn gijgwn manhget, lai gwn di raetmoguh、raetmoegngaex、lauxbaeg hau、nohyiengz、nohvaiz ndeu, nohgaeq dwg raeuj bouj, ndaej habdangq gwn di he. Linghvaih, nohbya it bi seiq geiq cungj gwn ndaej. Danhseih mizmbangj vunz cijdan yawjnaek gwn noh, cix lumz bouj gwn di gijgwn nyinzsei ndeu.

Seizdoeng mbwn nit, habdangq gwn di gijgwn hamz youzlauz lai ndeu, hix ndaej lai gwn di byaekmak caeuq haeuxco daengj gijgwn nyinzsei lai he, aenvih gij nyinzsei youq ndaw dungxsaej caengz deng siuvaq lij ndaej sup aeu gij huqdoeg ndaw nyaq gijgwn, hawj gij huqdoeg neix riengz haexnyouh baiz ok rog ndang daeuj. Linghvaih, nyinzsei gijgwn ndaej gemjsiuj ndang vunz supsou youzlauz, fuengz ndang vunz fat biz.

Yingzyangj yozgyah genyi naeuz, vunz- raeuz moix ngoenz ceiq siuj aeu gwn 27 gwz nyinzsei doxhwnj cij ndaej hwnj daengz yawhfuengz caeuq baujgen cozyung. Vunz- raeuz ndaej gaengawq aenndang sihyau diuzcwngj sam donq gijgwn, baujcwng ndaej gwn haeuj nyinzsei cukgaeuq. Yienghneix, gijgwn lawz hamz miz nyinzsei lai ne? Haujlai haeuxgok、duh、lwgmak caeuq makgenq lai rox noix cungj hamz miz nyinzsei, hoeng raeuz cix mbouj rox, dauqfanj begbeg gveng bae ndwi, yinxhwnj vunzraeuz ngoenznaengz nyinzsei gijgwn ndaw ndang mbouj gaeuq. Gizsaed, raeuz ndaej doenggvaq diuzcez gwnndoet sibgvenq, diuzcwngj gwnndoet gezgou, youq mbouj sienghaih aenndang cingzgvang lajde daeuj fuengz danjgucunz ndaw ndang demlai.