Mehdaiqndang ngamq baenz dwgliengz seiz, ndaej sawq yungh gij fuengfap baihlaj daeuj ceihyw:

1、Mwh ae seiz, ndaej dub aen gyaeqgaeq he gyaux yinz, dwk di begdangz caeuq di raemxhing ndeu, heuz byongh cenj raemxgoenj he gwn, gwn 2 daengz 3 baez couh ndei.

2、Gwn dang nohgaeq ndaej gemjmbaeu ndaeng saek、mug rih. Ciengzseiz gwn dang nohgaeq ndaej demgiengz rengz dingj bingh, yawhfuengz baenz dwgliengz. Dwk di hozceu、hingndip he roengz dang nohgaeq bae gwn, roxnaeuz cawj mienh seiz dwk roengzbae gwn, ndaej yw dwgliengz.

3、Ngamq baenz dwgliengz conghhoz youh haenz youh in seiz, moix gek 10 faen cung yungh raemxgyu gwd riengx bak caeuq riengx conghhoz baez ndeu, guh 10 baez couh ndei.

4、Ndingq 42 doh baedauq raemxraeuj roengz ndaw cenj bae, leuxle dawz bak、ndaeng iet gvaq gwnz bak cenj bae, mboujduenh sup heiqfwi haeujbae, ngoenz 3 baez.

5、Mehdaiqndang baez baenz dwgliengz, wng caenhvaiq gamhanh ganjyenj, siucawz binghdoeg. Dwgliengz mbaeu ndaej lai gwn di raemxgoenj he, haeujsim yietnaiq caeuq baujraeuj. Dwgliengz youqgaenj caemhcaiq buenx miz fatndat seiz, cawz guh itbuen cawqleix le, lij aeu caenhvaiq gyangq ndat, lumj najbyak、ndoenjhoz oep nae’gep daengj.

Seizdoeng caeuq seizcin dwg aen geiqciet riuzhengz baenz dwgliengz, meh- daiqndang ceiq ndei noix bungqdeng vunz baenz dwgliengz, gaej bae giz vunz lai guhcaemz, noix ok dou cunzcet, vunz couh noix baenz dwgliengz lo.