Seizdoeng dwg aen geiqciet gig nit ndeu, haujlai vunz cungj gamjdaengz gig mbouj hab’wngq, loq mbouj siujsim couh gojnwngz ndaej bingh. Ndigah, seizdoeng itdingh aeu fuengz nit ndei. Conhgyah daezsingj naeuz, seizdoeng aeu daegbied fuengz “haj nit”.

1、Fuengz ndoenjhoz nit. Seiz- doeng ndoenjhoz yungzheih ndaej bingh. Canghyw guzsanghgoh gaisau naeuz, ndoenjhoz dwg giz ceiq youq- gaenj aenndang bouxvunz, gizde mboujdanh sailwed lai, lij miz haujlai giz hezvei dem. Daenj buhhozdaengj mboujdanh ndaej dangj rumznit, bauj- raeuj aenhoz, lij ndaej hawj sailwed aen’gyaeuj caeuq ndoenjhoz mienx deng rumznit gig yinxhwnj sousuk dem, doiq yawhfuengz hezyaz sang、sim sailwed baenzbingh、ninz mbouj ndaek daengj cungj miz ndeicawq. Linghvaih, heux diuz gaenheuxhoz ndeu, hix ndaej baujraeuj.

2、Fuengz ndaeng nit. Mbwn nit le dienheiq engqgya hawqsauj, haujlai vunz cungj baenz ndaeng haenz. Raeuz mboujfuengz yungh aen banhfap aeu nit daeuj ceih nit. Couhdwg haetnaengz roxnaeuz yaek ok rog ranz bae cunz gaxgonq yungh raemxgyoet cat giuzndaeng. Canghyw byaujsi naeuz, ngoenznaengz haet- haemh yungh raemxgyoet swiq ndaeng mizleih demgiengz nemmuek aen- ndaeng menjyizliz, dwg aen banhfap ndei fuengzceih ndaeng haenz ndeu. Yungh raemxgyoet swiq ndaeng seiz, swnhbienh nunaenx giuzndaeng ndaej gaijndei lwed nemmuek aenndaeng lae baedauq, ndaej bangcoh gaijndei ndaeng saek、aetcwi.

3、Fuengz bwt nit. Aeu gaem haeuxcid ndeu cawj baenz cuk, dwk caet dug coengbieg caet gep hing，heuz buenq cenj raemxmeiq langh raeujremq seiz gwn, gwn le hwnj mbonq bae ninz goeb denz, hawj de gug ndat loq ok di hanh ndeu. Ngoenznaengz haethaemh gak gwn baez ndeu, lienzdaemh gwn song ngoenz.

4、Fuengz hwet nit. Gidij guhfap dwg: Song angjfwngz doxdoiq nucat ndat le, cuengq youq giz laenghwet yaep ndeu, doeklaeng yunghrengz naenxcat roengz daengz gwnz caek- haex. Moix baez guh 50 daengz 100 mbat, ngoenznaengz haethaemh gak guh baez ndeu.

5、Fuengz din nit. Cimq din caeuq raemxndat swiq din mbouj ityiengh, duihnazgoh laujcunghyih gaisau naeuz, cimq din aeu haeujsim baihlaj sam diemj:

Daih’it dwg dohraeuj, raemx- raeuj ceiq ndei dwg 40 doh baedauq, raemx mued gvaq da’baeu couh ngamj.

Daihngeih dwg seizgan, moix baez cimq 20 daengz 30 faen cung, seiz mbouj seiz demgya raemxndat baujciz raemx raeuj, cimq le raen naengnoh loq nding di couh ndaej.

Daihsam dwg nunaenx, cimq din le mad hawq yungh fwngz nunaenx lwgdin caeuq angjdin 2 daengz 3 faen cung. Buenq diemj cung dauqndaw haeujninz.

Linghvaih aeu haeujsim dwg, gaej ngamq gwn haeux sat doq cimq din, boux baenz binghnyouhdangz raemx cimq din gaej ndat lai. Danhfanz boux deng coemh sieng、boux hwnj baez ok nong、boux hwnj dokraemx、boux baenz mazcimj、boux din nyaeuq dek caeuq boux din rogsieng cungj mbouj hab cimq din. Boux cimq din gocwngz ndawde raen miz saenzcingz mbouj ndei、saeknaj haumiek、ok hanhheu daengj mbouj doengz bingzciengz seiz wng dingz roengzdaeuj, caemhcaiq gibseiz soengq bae yihyen ra canghyw duenq yw.