Doiq boux daengx ngoenz nyaengqlili daeuj gangj, baenz haexgaz、dungx ciengq、dungx in daengj bingh couh lai lo, bae yihyen genjcaz youh mbouj raen miz maz bingh. Baenzneix, mboujfuengz doenggvaq gwnndoet diuzleix daeuj gaijndei dungxsaej gengangh, lumjbaenz gwn di namzgva ndeu.

Namzgva mboujdanh dwg huqndei ciengx dungx, doiq mehmbwk daeuj gangj lij ndaej baiz doeg meijyungz dem. Cunghyih nyinhnaeuz, namzgva ndaej bouj ndaw ik heiq、siu haenz dingz in、gej doeg gaj non. Doiq boux baenz dungx hawnyieg miz haemq ndei ceihyw cozyung. Ndaw namzgva hamz miz dansuij vahozvuz caeuq gojgyauh gig lai, gwn de ndaej baujhoh nemmuek dungxsaej mienx deng gijgwn co gig sieng; doengzseiz de hamz veizswnghsu、gai、linz daengj cwngzfwn gig lai, ndaej cangq dungx siu cwk. Gojgyauh ndaej coicaenh giz biux naeuh hobndei, sup aeu nengznon caeuq gij doxgaiq miz doeg, ndigah hwnj daengz baiz doeg cozyung. Gij ganhlucunz ndaw namzgva ndaej doeng haex, ndaej gemjsiuj huqdoeg ndaw haex haih aenndang vunzraeuz. Nyinzsei gijgwn cibfaen unqsaeq, ndaej coicaenh conghsaej noddoengh, vanjgaij haexgaz, doengzseiz de lij mbouj sieng daengz nemmuek aendungx dem.

Seizdoeng dwg aen geiqciet ceiq ndei gwn namzgva, naengj gwn roxnaeuz cawj cuk、aeuq dang gwn caemh ndaej. Lumj haeuxfiengj aeuq namzgva cuk daengj. Aeu haeujsim dwg, namzgva singq raeuj, gwn lai rox baenz caepndat. Ndigah, boux dungx ndat bak haeu roxnaeuz boux naengnoh hwnj baezdoeg raen rumz couh humzhaenz、boux baenz vuengzbiu、boux baenz din ro caeuq boux baenzsiq aek ciengq、boux heiq saek caep yaemz mbouj hab gwn lai.