Seizdoeng mbwn nityauyau, caemx raemxgyoet aeu gangj gohyoz cij ndaej.

Daih’it, caemx raemxgyoet aeu aenq ndang bae caemx. Ndang vunz miz aen sikwngq gocwngz he, ndigah, caemx raemxgyoet aeu daj seizcou roxnaeuz ngamq haeuj doeng seiz hainduj gvaqdoh daengz seizdoeng. Doengzseiz, caengz caemx raemxgyoet gaxgonq aeu sien guh “ndat ndang” yindung, yungh fwngz nucat naengnoh caeuq hohndok, cigdaengz aenndang loq nding、fatndat cij hainduj caemx. Mwh caemx, sien daj song genga rwed raemx, gvaq geij faen cung caiq rwed fajaek caeuq baihlaeng.

Daihngeih, caemx raemxgyoet aeu haeujsim dohraeuj caeuq seizgan. Caemx raemxgyoet seiz, raemx gaej gyoet lai, itbuen miz 5 daengz 10 doh couh ngamj, caemx 10 daengz 15 faen cung couh ndaej, ceiq nanz mbouj ndaej mauhgvaq buenq diemj cung. Caemx ndei le, gibseiz aeu gaen mad hawq, caiq aeu gaen cat daengz naengnoh loq nding fatndat cij dingz, coi sailwed laj naeng vaiq di mbehai, yienghneix ndaej hawj daengx ndang gamjdaengz raeujrub cwxcaih.

Daihsam, yawj aenndang gamjsouh baenzlawz yiengh. Dangh- naeuz mwh caemxndang raen naeng- noh laebdaeb bienq hau、gyaeuj ngunh、ndang saenz seiz wngdang dingz caemx, mienxndaej fatseng loeklak.

Geij cungj vunz lajneix mbouj hab caemx raemxgyoet.

Caemx raemxgyoet mbouj dwg vunzvunz caemx ndaej. Lwgnding caeuq bouxlaux 60 bi doxhwnj ceiq ndei gaej caemx raemxgyoet; meh- mbwk youq geizdawzsaeg、geizdaiq- ndang gaej caemx raemxgyoet, bingzseiz caemxndang raemx gaej gyoet lai; boux ciengzgeiz gyaban roxnaeuz boux aenndang menjyizliz doekdaemq gaej caemx raemxgyoet, mboujnex rox hawj nengzbingh binghdoeg ciemq haeuj ndang bae, yinxhwnj baenz dwgliengz、conghhoz in; boux doiq raemxgyoet miz minjganj mbouj hab caemx raemxgyoet, mboujnex naengnoh rox hwnjcimj; boux hezyaz sang caemx raemxgyoet rox hawj hezyaz swng sang, caemhcaiq rox cauhbaenz sailwed uk ok lwed、mauhfung、maezgae; boux simdaeuz miz bingh caemx raemxgyoet, rox gya’naek simdaeuz fudanh, yaeuhfat baenz sim geuj in、gipsingq sim saek dai caemhcaiq fwtdai; boux baenz fungcaep、boux baenz coguz sinzgingh in hix mbouj hab caemx raemxgyoet.