Ngoenzneix fwn doeksasa, gou ok rog bae guhcaemz mbouj ndaej, mbwq lai lo. Yienghneix gou couh caeuq daegnuengx doxdax dwk gyangq.

Dou dawz aen eij he daeuj guh aenbuenz doxdax dwk gyangq.

Doxdax hainduj lo, song boux dou gag dawz ok aen’gyangq swhgeij, gou dawz ok aen’gyangq gig geng gig ak he. Daegnuengx hix mbouj saw hawj gou, dawz ok aen’gyangq gig miz rengz dwk bouxwnq he.

Doxdax gaenq hainduj lo, gou caeuq daegnuengx boux mbouj nyiengh boux, song aen gyangq youq gwnz buenz doxdwk haenx aenvih doxdaemj yungh rengz lai gaenq baenq menh roengzdaeuj haujlai. Cingq youq mwh yaek dingz roengzdaeuj haenx, sawq- mwh, aen’gyangq daegnuengx yied baenq yied vaiq, cingsaenz gvaekgvaek, aen’gyangq gou cix naiqnuknuk, yied baenq yied menh, ginggvaq sijsaeq cazyawj, gou fatyienh aen’gyangq daegnuengx dwg baenq coh baihswix, aen’gyangq gou cix dwg baenq coh baihgvaz, gvaiqmboujndaej dwg yienghneix, caen yaemdoeg! Daeg- nuengx de vihliux ndaej hingz couh yungh ciu he dwk hingz gou. Ciengz daih’it gou saw lo, daegnuengx sou aen’gyangq de dauq, de angq dwk fwngz vad din diuq.

Doxdax lij caengz baen sawhingz bw. Ciengz daihngeih hainduj lo, song boux dou gag dwk aen’gyangq swhgeij okbae, song aen gyangq baenqlulu, yawj mbouj ok aen lawz baenq ndaej vaiq aen lawz baenq ndaej menh, song aen gyangq lumjbaenz gig doxndei, aen mbouj bungq aen. Aen’gyangq gou dwg aen’gyangq baenq ndaej seizgan nanz he, ciengz doxdax neix gou siengsaenq gou itdingh dwk ndaej hingz.

Sawqmwh aen’gyangq daeg- nuengx yungh cungj fuengfap cienz- gangj he, couhdwg sawqmwh daenq- senj, aen de daj seiq baih daeuj gung aen gou, aen gou deng gung dwk wngqfouq mbouj gib, ciu neix caen ak, ndaej daj seiq baih gung, gung dwk aen gou doeng nyeng sae laemx, mbouj miz banhfap baenq. Gou youh saw lo. Daegnuengx angqvauvau, aenvih de youh caiq baez dwk baih gou.

Yienznaeuz gou baezneix saw lo, hoeng gou siengsaenq baezlaeng gou itdingh hingz de, aenvih saetbaih ndaej rox hit, saetbaih dwg goekgaen guh ndaej baenz.

(roek nienzgaep Couh Yenzdiz)